पोखरा ।
अमेरिकी क्लब बीवाईएससी पोखरामा जारी २२ औं आहारारा पोखरा गोल्डकपको फाइनलमा पुगेको छ । पोखरा रंगशालामा बुधबार भएको दोस्रो सेमिफाइनलमा चर्च ब्वाइजलाई १–०ले हराउँदै बीवाईएससीले फाइनल यात्रा पक्का गरेको हो ।

निकै प्रतिस्पर्धात्मक बनेको खेलको पहिलो हाफको अतिरिक्त समयमा बीवाईएससीले अग्रता लिएको थियो । पहिलो हाफको इन्जुरी समयमा बीवाईएससीका रोजिन प्रजापतिले गोल गर्दै टिमलाई अग्रता दिलाएका थिए ।
३ मिनेट थपिएको इन्जुरी समयमा प्रजापतिले खेलको ४६ औं मिनेटमा गोल गर्न सफल रहे ।

उनले बीवाईएससीका प्रविन बस्नेतको पासलाई हेडिङ गर्दै प्रजापतिले विपक्षी गोलपोस्टको जाली चुमाएका हुन् ।
सोही अग्रतालाई बचाउँदै बीवाईससी जारी आहारारा पोखरा गोल्डकपको फाइनल पुग्न सफल रह्यो ।

खेलको अन्तिमतिर चर्च ब्वाइजका खेलाडीले रातो कार्ड पाउँदै बाहिरिएपछि १० खेलाडीमा सीमित हुन पुगेको थियो । खेलको ८३ औं मिनेटमा चर्च ब्वाइजका आशीष चौधरीले रातो कार्ड पाउँदै मैदानबाट बाहिरिएका थिए ।

चौधरीले बल खोस्ने क्रममा डाइलो इराकागलाई लडाइदिएपछि रेफ्री प्रज्वल क्षेत्रीले रातो कार्ड दिएका थिए ।
ए डिभिजन लिग विजेता मच्छिन्द्रलाई क्वार्टरफाइनलमा ३–१ गोलअन्तरले रोक्ने क्रममा चौधरीले पनि एक गोलको योगदान दिएका थिए ।

फाइनलमा उपाधिका लागि अमेरिकी क्लब बीवार्ईएससीले संकटासँग पुस २३ गते मैदानमा उत्रिने छ ।
अघिल्लो पटक क्वार्टरफाइनलबाटै बाहिरिएको बीवाईएससी ६ पटकको विजेता र ६ पटक उपविजेता बनेको मनाङमर्स्याङ्दीलाई पराजित गर्दै सेमिफाइनल प्रवेश गरेको हो ।

पहिलो पटक आहारारामा सहभागी भएको चर्च ब्वाइजले मच्छिन्द्र क्लबलाई पराजित गर्दै अन्तिम ४ का लागि स्थान सुरक्षित गरेको थियो ।