पोखरा ।
पोखरा १५ को आयोजनामा सुरु भएको वडा १५ स्तरिय बृहत खेलकुद महोत्सवमा ९ सयभन्दा बढी खेलाडीले सहभागिता जनाएका छन् । महिला तथा पुरुषतर्फका विभिन्न ८ वटा इभेन्ट हुँदैछन् ।

प्रतियोगिताको औपचारिक उद्घाटन बिहीबार पोखरा महानगरका मेयर धनराज आचार्यले गर्दै छन् । वन विज्ञान अध्यायन संस्थानको मैदानमा बुधबारदेखि नै खेल अनौपचारिक रुपमा सुरुवात भएका छन् । वडा १५ का वडाध्यक्ष तोरण बानियाँले रेफ्री भक्त गुरुङलाई बल हस्तान्तरण गर्दै अनौपचारिक रुपमा खेल सुरुवात गरे ।

‘औपचारिक उद्घाटन बिहीबार हँुदै छ, सहभागी खेलाडी धेरै भएकाले ३ दिनमा प्रतियोगिता नसकिने भएपछि खेल सुरु गर्‍यौं,’ वडाध्यक्ष बानियाँले भने । प्रतियोगिता संयोजकसमेत रहेका वडा सदस्य आशीष भण्डारीका अनुसार अन्तर क्लब फुटबलमा १७, विद्यालय स्तरीयमा ५, महिला भलिबलमा ११, पुरुष भलिबलमा ९, रस्साकसीमा १८ टिमले भाग लिएका छन् ।

त्यस्तै ४० वर्ष माथिका महिला दौडमा ७१ जनाले, ५० वर्ष माथिको पुरुष दौडमा २६ जनाले तथा फरक क्षमता भएकाको बास्केट बल प्रतियोगितामा २० जना खेलाडीले भाग लिएका छन् । वडाको युवा लक्षित कार्यक्रम अन्तर्गत खेलकुद महोत्सव आयोजना गरिएको प्रतियोगिता संयोजक आशीष भण्डारीले जानकारी दिए ।

‘स्वस्थ्य समाज निर्माण र आपसमा भाइचारा सम्बन्ध प्रगाढ पार्न यो प्रतियोगिता आयोजना गरिएको हो,’ भण्डारीले भने । यो कार्यक्रमलाई वडाको वार्षिक कार्यक्रममा राखेर बर्षेनी सञ्चालन गरिने उनको भनाइ छ । पुष ३० गतेसम्म प्रतियोगिता चल्नेछ ।