पोखरा ।
तेस्रो टाइगर कप राष्ट्रिय तथा अन्तर्राष्ट्रिय आमन्त्रित खुल्ला क्लव च्याम्पियनसिप महिला तथा पुरुष भलिबल प्रतियोगिता २०७९ पोखरा रंगशालामा आइतबारदेखि सुरु हुँदै छ । प्रतियोगिताको तयारी पूरा भएको आयोजकले जनाएको छ ।

आइतबार दिउँसो १ बजे प्रतियोगिताको उद्घाटन गण्डकी प्रदेशका मुख्यमन्त्री खगराज अधिकारीले गर्ने तय छ । प्रतियोगिताका खेल भने उद्घाटनअघि नै सुरु हुने टाइगर ग्रुप अफ पोखराकाका अध्यक्ष नारायणप्रसाद शर्माले जानकारी दिए । आइतबार ३ खेल हुनेछन् । पहिलो खेल बिहान १० बजे महिलातर्फ न्यू डायमन्ड र नेपाल आर्मी भिड्ने छन् ।

दोस्रो खेलमा मध्यान्ह १२ बजे पुरुषतर्फ त्रिभुवन आर्मी र सशस्त्र प्रहरीको एपिएफ क्लबबीच हुनेछ । दिउँसो साढे २ बजे आयोजक पुरुषतर्फ गण्डकी प्रदेश र नेपाल पुलिसबीच खेल हुनेछ । राउन्ड रोबिनको आधारमा सञ्चालन हुने प्रतियोगिताको अन्तिम समयमा आएर महिलातर्फ नेपाल पुलिसले सहभागिता नजाउने बताएको टेक्निकल टिमका सदस्य टहलसिंह थापा मगरले जानकारी दिए ।

‘केही खेलाडी घाइते भएको र कोही बिरामी भएको कारण देखाउँदै नेपाल पुलिस महिला टिम अन्तिम समयमा नआउने घोषणा गर्‍यो,’ उनले भने । अन्तिम समयमा महिलातर्फकै अर्को १ विदेशी टोली भारतको केरेला स्टेट इलेक्ट्रोनिक बोर्डसमेत नआउने भएको आयोजकले जनाएको छ ।

महिलातर्फ २ टोलीको सहभागिता नभएपछि आयोजकले गण्डकी प्रदेशको महिला टिमलाई प्रतियोगितामा सहभागी गराएको छ । गण्डकीको महिला टिममा ३ जना भारतीय खेलाडी टोलीमा समावेश गरिएको आयोजकले जनाएको छ । गण्डकीको कप्तानी राष्ट्रिय महिला भलिबल टिमकी कप्तान अरुणा शाहीको गर्ने छिन् ।

प्रतियोगितामा पुरुषतर्फको १ विदेशी टिम सेन्ट जोशेफ वाज स्पोर्टस् क्लब श्रीलंकाको सहभागिता छ । य पुरुषतर्फ नेपाल आर्मीको त्रिभुवन आर्मी, सेन्ट जोसेफ वाज स्पोर्टस् क्लब श्रीलंका, नेपाल प्रहरीको नेपाल पुलिस क्लब, सशस्त्र प्रहरी बलको एपिएफ क्लब, गण्डकी प्रदेशको टिमको सहभागिता रहनेछ ।

प्रतियोगितामा महिलातर्फ नेपाली सेनाको त्रिभुवन आर्मी क्लब, गण्डकी प्रदेश, सशस्त्र प्रहरी बलको एपिएफ क्लब र होङ्गवान्जी न्यू डायमन्ड स्पोर्टस क्लब छन् । महिला–पुरुष दुवैतर्फ उपाधी विजेता टिमलाई समान ५ लाख रुपैयाँ नगद, उपविजेता टिमलाई २ लाख ५० हजार, तेस्रो हुने टिमलाई नगद १ लाख २५ हजार र सान्त्वना हुने टिमलाई ६५ हजारसहित ट्रफी र प्रमाण पत्र प्राप्त दिइने छ ।

प्रतियोगितामा हरेक दिनको खेलमा उत्कृष्ट खेलाडीलाई नगद ५ हजार र ३ हजार बराबरको स्वास्थ्य परीक्षण कुपन दिइनेछ । महिला तथा पुरुषतर्फ उत्कृष्ट एक/एक खेलाडीले जनही २५ हजार प्राप्त गर्नेछन् भने हरेक विद्याका उत्कृष्ट प्रशिक्षकलाई समान नगद १० हजार र ट्रफी प्रदान गरिने आयोजकले जनाएको छ ।

प्रतियोगितालाई थप आकर्षण बनाउन र दर्शकलाई सहज ढंगले खेल हेर्ने अवसर प्रदान गर्ने गरी विशेष प्रकारको प्यारापिट निर्माण गरिएको अध्यक्ष शर्माले बताए । ‘प्रतियोगितालाई अन्तर्राष्ट्रिय स्तरको बनाउन एलइडी स्क्रिन राखिएको छ । हामीले दर्शकलाई सहज ढंगबाट खेल अवलोकन तथा मनोरञ्जन लिन अस्थायी प्यारापिट बनाएका छौं भने वृद्ध–वद्धाका लागि छुट्टै कुर्चीको व्यवस्थासमेत गरका छौं,’ उनले भने ।