पोखरा ।
बुद्ध टोल युवा क्लबले माघको तेस्रो साता १६ औं बिटी कप छैटौं वीरेन स्मृति सेभेन ए साइड खुला फुटबल प्रतियोगिता आयोजना गर्ने भएको छ ।

पोखरा महानगरपालिका १ पुरानो टुडिँखेल मैदानमा आगामी २२ गतेदेखि फागुन २ गतेसम्म प्रतियोगिता सञ्चालन गर्ने शनिबार आयोजित पत्रकार सम्मेलन मार्फत जानकारी दिइएको हो । क्लब अध्यक्ष असिम थापाले फुटबलको विकास गर्ने उद्देश्यसहित विगत लामो समयदेखि प्रतियोगिता सञ्चालन गर्दै आएको बताए ।

उनले क्लबका सल्लाहकार स्वर्गीय वीरेन गुरुङको स्मृतिमा विगतमा चैतमा प्रतियोगिता आयोजना गरिँदै आएकोमा यस पटक गुरुङको जन्मदिनको दिनदेखि सुरु गरिने जानकारी दिए । ‘प्रतियोगिता उहाँको स्मृतिमा चैतमा आयोजना गर्दै आएका थियौं’, अध्यक्ष थापाले भने, ‘चैत्रमा हावाहुरी र पानी पर्ने भएकाले दाइकै जन्मदिन पारेर प्रतियोगिता माघमा सारेका छौं ।’

उनले सो प्रतियोगिताको विजेतालाई सिल्ड, मेडल तथा प्रमाणपत्रसहित १ लाख ६१ हजार १ सय ५१ रुपैयाँ प्रदान गरिने जानकारी दिए । उपविजेताले सिल्ड, मेडल तथा प्रमाणपत्रसहित १ लाख १ हजार १ सय ११ रुपैयाँ प्राप्त गर्ने छन् ।

प्रतियोगिताका सर्वाेत्कृष्ट खेलाडीलाई ट्रफीसहित ८ हजार दिइनेछ ।अध्यक्ष थापाले उत्कृष्ट गोलरक्षक, डिफेन्डर, मिडफिल्डर र सर्वाधिक गोलकर्तालाई जनही ६ हजार रुपैयाँ र ट्रफी प्रदान गरिने बताए । यस्तै अनुशासित टिमलाई ९ हजार र ट्रफी दिइनेछ ।

प्रतियोगितामा करिब ४० टिमको सहभागिता रहने र आयोजनाका लागि करिब २३ लाख खर्च हुने अनुमान छ ।