गण्डकी प्रदेशमा ७ वटा मन्त्रालय राख्ने निर्णय सोमबारको प्रदेश मन्त्रिपरिषद बैठकले गरेको छ । सोमबार बिहान साढे ९ बजे बसेको मन्त्रिपरिषद् बैठकले ७ वटा मन्त्रालय र ती मन्त्रालयको कार्यक्षेत्रका बारेमा समेत टुंगो लगाएको हो ।
मन्त्रालयको संख्या घटाउने एजेन्डामा छलफल गर्न मुख्यमन्त्री निवासमा सोमबार बिहान सत्ता गठबन्धनको बैठक बसेको थियो । उक्त बैठकले टुंग्याएको विषयलाई मन्त्रिपरिषदबाट पारित गरिएको हो ।
संविधानले प्रदेश सभा सदस्यको २० प्रतिशत मन्त्री बनाउन सकिने व्यवस्था गरेको छ । ६० सदस्यीय प्रदेश सभा रहेकोमा गण्डकीमा १२ जना मन्त्री बनाउन मिल्छ । पूर्ववर्ती नेपाली कांग्रेसका नेता कृष्णचन्द्र नेपाली नेतृत्वको सरकारमा १२ मन्त्री थिए ।
नवनिर्वाचित सरकारले भने ७ मन्त्रालय बनाएर आर्थिक भार कम गर्ने भएको हो । गण्डकीका संस्थापक मुख्यमन्त्री पृथ्वीसुब्बा गुरुङले पनि सुरुमा ७ र पछि ८ मन्त्री बनाएका थिए ।