पोखरा ।
तेस्रो टाइगर कप महिला तथा पुरुष भलिबल प्रतियोगितामा अन्तर्गत महिलातर्फको सेमीफाइनल समीकरण पूरा भएको छ ।

टाइगर ग्रुप अफ पोखरा नेपालको आयोजनामा भइरहेको प्रतियोगिताको महिलातर्फ सशस्त्र प्रहरी बल (एपिएफ), त्रिभुवन आर्मी क्लब, होङवान्जी न्यु डायमन्ड र गण्डकी प्रदेश सेमिफाइनल प्रवेश गरेका हुन् ।

लिग चरणमा शत प्रतिशत जित निकाल्दै एपिएफ सेमिफाइलनमा प्रवेश गरेको हो । आर्मी २ खेलमा जित निकाल्दै दोस्रो र डायमन्डले १ खेलमा जित निकाल्दै सेमिफाइलनको यात्रा तय गरेका हुन् ।

जितविहीन रहेको गण्डकी प्रदेश पनि सेमिफाइलनमा प्रवेश गरेको छ । प्रतियोगितामा ४ टिममात्र सहभागी हुँदा लिग चरणका कुनै पनि खेल नजितेको गण्डकी प्रदेशले सेमिफाइनल खेल खेल्ने अवसर पाएको हो ।

पहिलो खेलमा एपिएफसँग ३–० सोझो सेटमा पराजित भएको गण्डकी प्रदेशको टोली दोस्रो खेलमा आर्मीसँग पनि ३–० को सोझो सेटमा पराजित हुन पुग्यो । लिग चरणको अन्तिम खेलमा न्यू डायमन्डसँग ३–१ को सेटमा पराजित गण्डकी प्रदेश अंकविहीन रह्यो ।

पहिलो खेलमा एपिएफविरुद्ध गण्डकी प्रदेश पहिलो सेट २५–११, दोस्रो सेट २५–१९ र तेस्रो सेट २५–१६ पराजित हुन पुगेको थियो । दोस्रो खेलमा आर्मीसँग पहिलो सेट २५–१०, दोस्रो २५–१६ र तेस्रो सेट २५–१६ ले गुमायो ।

लिग चरणको अन्तिम खेल न्यू डायमन्डविरुद्ध पहिलो सेट २५–१९ ले जितेको गण्डकी प्रदेशले त्यसपछिका ३ सेटमा २५–१५, २५–१४ र २५–११ ले गुमाउन पुग्यो ।

प्रतियोगिताको सुरुआती अवस्थामा महिलातर्फ गण्डकी प्रदेशले सहभागी नजनाउने भनिएको थियो । पछि विदेशी टिम सहभागी नहुने भएपछि गण्डकी प्रदेश सहभागी हुने अवसर पायो । सोअनुसार महिलातर्फ ५ टिम सहभागी हुने अवस्था थियो ।

तर, अन्तिम समयमा नेपाल पुलिस क्लबले सहभागिता नजनाउने भएपछि महिलातर्फ ४ टिममात्र खेल्ने अवस्था आयो । ४ टिमलाई लिग कम नकआउटबाट खेलाइयो । त्यसमा ४ वटै टिम नकआउट अर्थात सेमिफाइलनमा प्रवेश गरे । त्यसमा कुनै पनि खेल नजितेको गण्डकी प्रदेश पनि सेमिफाइनल खेल्ने अवसर पायो ।

सेमिफाइलनमा प्रवेश गरेको गण्डकीले लिग चरणमा शत प्रतिशत जित निकालेको एपिएफसँग बिहीबार खेल्नेछ । दोस्रो सेमिफाइलनमा दोस्रो स्थानमा रहेको आर्मीले तेस्रो स्थानमा रहेको न्यू डायमन्डसँग प्रतिस्पर्धा गर्नेछ ।

पुरुषतर्फको खेलमा आयोजक गण्डकी प्रदेशले आर्मीलाई ३–२ ले पराजित गरेको छ । पहिलो सेट २५–२३ र दोस्रो सेट २५–२३ ले आर्मीलाई सुम्पिँदै गण्डकी प्रदेशले पछिल्लो ३ सेटमा उत्कृष्ट पुनरागमन गर्दै खेल आफ्नो पक्षमा पार्‍यो ।

गण्डकीले तेस्रो सेट २५–२३, चौथो सेट २५–२२ र पाँचौ सेट १५–१३ ले जित निकाल्न सफल भयो । खेलमा गण्डकीका घनश्याम चौधरी प्लेयर अफ दि म्याच र रबी केसी बेस्ट स्पाइकर घोषित भए ।

एपिएफले विदेशी टोली श्रीलंकाको सेन्ट जोसेफ भाज स्पोर्टस क्लबलाई ३–० को सोझो सेटमा पराजित गरेको छ । सेन्ट जोसेफलाई एपिएफले ३ वटै सेट २५–२३ ले पराजित गरेको हो ।

प्रतियोगितामा एपिएफ ४ खेलमा ४ खेलमै जित निकाल्दै १२ अंकका साथ शीर्ष स्थानमा रहँदा गण्डकी ३ खेलमा २ खेलमा जित र १ खेलमा हार व्यहोर्दै ६ अंकका साथ दोस्रो, आर्मी ३ खेलमा १ जित र २ हारसहित ४ अंक, नेपाल पुलिस ३ खेलमा १ जित र २ खेलमा हारका साथ २ अंकसहित चौथो र सेन्ट जोसेफ अंकविहीन रहँदै अंक तालिकाको पुछारमा छ ।

महिला–पुरुष दुवैतर्फ उपाधि विजेता टिमलाई ५–५ लाख नगद, उपविजेता टिमलाई समान नगद २ लाख ५० हजार, तेस्रो हुने टिमलाई नगद १ लाख २५ हजार र सान्त्वना हुने टिमलाई नगद ६५ हजारसहित ट्रफी र प्रमाण पत्र दिइनेछ ।