पोखरा ।
शैक्षिक क्षेत्रमा फरक पहिचान बनाएको पोखराको मदरल्यान्ड माध्यमिक विद्यालयमा श्रीपञ्चमीको अवसर पारेर सरस्वती पूजा तथा अक्षरारम्भ कार्यक्रम भएको छ ।

विद्यालयमा प्रतिस्थापित सरस्वतीको मन्दिरमा कक्षा ४ मा अध्ययनरत विद्यार्थीद्वारा सामूहिक रूपमा सरस्वती वन्दना वाचनसहित विशेष पूजापाठ र आराधना गरिएको हो ।

विद्यालयका १० जोड २ व्यवस्थापन समूहका संयोजक ईन्द्रप्रसाद पौडेल र शिक्षक आनन्द शर्माले पूजा आराधानामा सहजीकरण गरेका थिए ।

छात्र विशेष बराल र छात्रा स्वस्तिका बुढाथोकीले कर्ताको भूमिका निर्वाह गरेका थिए ।

विद्यार्थीले पढ्नुभन्दा अघि, संगित साधकले वाद्यवादन बजाउनुअघि र शिल्पकारले कलाकौशल निर्माण गर्नुभन्दा पहिले सरस्वतीको प्रार्थना र वन्दना गर्दछन् ।