दमौली ।
तनहुँको भानु नगरपालिकाले जिल्ला कारागार तनहुँलाई खाट हस्तान्तरण गरेको छ । कैदीबन्दीलाई सुत्नका लागि सहज होस् भन्ने उद्देश्यसहित नगरपालिकाले कारागारलाई खाट प्रदान गरेको हो ।

नगर प्रमुख आनन्दराज त्रिपाठीले १४ थान ‘डबल बेड’ साइजका खाट हस्तान्तरण गरेका हुन् । कारागारका निमित्त प्रमुख नारायणप्रसाद अधिकारीलाई त्रिपाठीले खाट हस्तान्तरण गरे । उनले नगरपालिकाले सामाजिक उत्तरदायित्वअन्तर्गत १ लाख बराबरको खाट सहयोग गरेको बताए ।

प्रमुख त्रिपाठीले भने, ‘कैदीबन्दीको सहजताका लागि विभिन्न पालिकाले सहयोग गरिरहेको थियो, कारागारका तर्फबाट हामीलाई पनि अनुरोध भएबमोजिम सहयोग गरेका हाैँ ।’

सहायक प्रमुख जिल्ला अधिकारी काशीराम गैरेले कारागारलाई सुधारगृहको रूपमा विकास गर्ने योजना सुनाए । कारागारलाई यसअघि व्यास नगरपालिकाको तर्फबाट ४०, म्याग्दे गाउँपालिकाको तर्फबाट ११, बन्दीपुर गाउँपालिकाको तर्फबाट ५, क्रिष्टिना गुरुङको तर्फबाट ६ थान खाट सहयोग भइसकेको छ ।

शुक्लागण्डकी नगरपालिकाले ५० हजार सहयोग गरेको थियो । देवघाट र घिरिङ गाउँपालिकालाई पनि सहयोगका लागि अनुरोध गरिएको निमित्त कारागार प्रमुख अधिकारीले बताए ।

कारागार तनहुँका कैदीबन्दीका लागि नयाँ भवन निर्माण भएको छ । यसअघि पुरानो भवन हुँदा क्षमताभन्दा बढी कैदीबन्दी भएका कारण भुइँमा सुत्नुपर्ने बाध्यता थियो ।

१ सय ३५ जना क्षमताको कारागारमा हाल २ सय ९५ कैदीबन्दी छन् । (ए) ब्लकमा १ सय २६, (बी) ब्लकमा १ सय ५० र (सी) ब्लकमा १९ कैदीबन्दी छन् ।