पोखरा ।
नेपाल भ्रमणमा रहेको तमु धीं युकेको टोलीलाई पोखरामा बिदाइ गरिएको छ । बेलायत फर्कन लागेको टोलीलाई तमु धीं नेपाल, नेपाल खेलकुद पत्रकार मञ्च गण्डकी लगायतका संघ, संस्थाले मंगलबार बेलुका बिदा गरेका हुन् ।

तमु प्ये ल्हु संघ, तमु सञ्चारकर्मी संघ, तमु कलाकार संघ, सहारा क्लब पोखरा, नेपाल भूतपूर्व खेलाडी मञ्च, नौलो घुम्ती, बगर भाइ खलक लगायतका संघ, संस्थाले टोलीलाई बिदा गरेका हुन् ।

टोलीले यो पटक गुरुङ समुदायको बाक्लो बस्ती रहेको कास्कीको घान्द्रुक र सिक्लेस गाउँ, पर्वतको चारभन्ज्याङ क्षेत्र र पूर्वस्थित ओखलढुंगाको रुम्जाटार क्षेत्र भ्रमण गरेको थियो ।

तमु धीं युकेका अध्यक्ष हरि गुरुङको नेतृत्वमा नेपाल भ्रमणमा रहेको टोलीले नेपालको भ्रमणमा रहँदा यहाँ विभिन्न क्षेत्रमा नगदसहित सहयोग गरेको थियो ।

कार्यक्रममा स्याङ्जाको साल्मेडाँडास्थित निर्माणाधीन गोरखा स्मारक निर्माणका लागि तमु धीं युकेले नगद १ लाख प्रदान ग¥यो ।

अध्यक्ष हरि गुरुङ र वरिष्ठ उपाध्यक्ष जुमकाजी गुरुङले स्मारक निर्माण समिति अध्यक्ष जंगबहादुर गुरुङ, महासचिव डा.चन्द्रबहादुर गुरुङलाई सो रकम हस्तान्तरण गरेका हुन् ।

कार्यक्रममा गण्डकी प्रदेशका सामाजिक विकास तथा स्वास्थ्य मन्त्री पञ्चराम गुरुङले गुरुङहरुको एकता औंल्याए । गुरुङ जातिका नाममा धेरै संघ, संस्था खुलेको बताउँदै मन्त्री गुरुङले एउटै छाता संस्थामा एकीकृत गर्नुपर्ने कुरामा जोड दिए ।

उनले भने, ‘गुरुङ जातिका नाममा धेरै संघ, संस्था खोलेर एकले अर्कोलाई दोषारोपण र गाली गर्नुभन्दा एउटै संघ, संगठनमा एकाकार गराएर त्यस संगठनलाई सशक्त र बलियो बनाउन सकिन्छ ।’

तमु धीं युकेका अध्यक्ष हरि गुरुङले सबैले संविधान र कानुनलाई सर्वोपरी ठानी देश र जनताका लागि इमान्दार रहेरअघि बढेमा मात्रै देशमा समृद्धि ल्याउन सकिने बताए ।

कार्यक्रममा तमु धीं नेपालका अध्यक्ष हुम तमुले विदेशमा स्थापना भएको संस्था तमु धीं युकेले नेपालको सामाजिक संघ, संस्था तथा खेलकुद क्षेत्रमा विशेष योगदान पुर्‍याएको जनाए ।

तमु धीं युकेका अध्यक्ष हरि गुरुङको अध्यक्षतामा भएको कार्यक्रममा वरिष्ठ उपाध्यक्ष जुमकाजी गुरुङ, नेपाल प्रतिनिधि मेजर लक्ष्मीप्रसाद गुरुङ, नेपाल खेलकुद पत्रकार मञ्च गण्डकी अध्यक्ष दीननाथ बराल लगायतले बोलेका थिए ।