पोखरा ।
अन्नपूर्ण गाउँपालिका कास्कीले वडा नं. १० मा निस्सा वितरण गरेको छ । गण्डकी प्रदेशमै सबैभन्दा पहिला निस्सा वितरण कार्यक्रम सुरुवात गरेको अन्नपूर्ण गाउँपालिकाले शनिबार वडा नं १० मा १० जना भूमीहीन दलित, ७ जना भूमीहीन सुकुम्बासी र ३ जना अव्यवस्थित बसोबासीलाई निस्सा वितरण गरेको हो ।

वडाध्यक्ष गौतम गुरुङ को अध्यक्षतामा भएको कार्यक्रममा गाँउपालिका अध्यक्ष विष्णुबहादुर केसीले राम्रो कार्यक्रमको सुरुवात भएको कार्यकालको पहिलो वर्षमै सबै भूमीहीनलाई जग्गा उपलब्ध गराएर भूमीपति बनाइने जनाए ।

कार्यक्रममा राष्ट्रिय भूमी आयोग अन्नपूर्ण गाउँपालिका इकाइ फोकल पर्सन ई प्रभात पौडेलले गाउँपालिकाका सबै वडामा फागुन महिनाभित्र निस्सा वितरण गर्ने र जग्गा धनी पुर्जा वितरण गर्ने नेपालमै पहिलो स्थानीय तह हुने बताए ।

उनले गाउँपालिकाले भूमीहीनलाई आवास प्रयोजनका लागि ३ सय ४० वर्ग मिटर र कृषि प्रयोजनका लागि २ हजार वर्ग मिटर जग्गा उपलब्ध गराइने जनाए ।

वडाध्यक्ष गुरुङले राष्ट्रिय भूमी आयोगको कार्यविधि अनुरुप वडाबाट गर्नुपर्ने सबै काम भएको र यथाशक्य यही वडामा र नपाएको खण्डमा गाउँपालिकाभित्र व्यवस्थापन गर्ने जनाए ।