सरकार बनून्, सरकारले गर्नुपर्ने काम नहून् । यस्तो हुनु हुँदैन । तर विडम्बना हामीकहाँ त्यही भएको छ । संघीयतापछि ३ तहका सरकार बनेका छन् । योजना डुब्लिकेसनले अनेक समस्या आएका छन् । तर केही आधारभूत पक्षमा यी सरकारको ध्यानै पुग्न सकेको देखिँदैन । यसको परिणाम केही दिनअघि मुस्ताङमा देखियो ।

सडक छेउमै रहेको घरमा आगलागी भयो, सिडिओसहितका जिम्मेवारी अधिकारी र स्थानीय त्यहाँ पुगे, तर आगो निभाउन सकेनन् । घर खरानी भयो । किनभने त्यहाँ दमकल थिएन । मुस्ताङ जिल्लाभरीमै एउटा पनि दमकल छैन । विपत्त बाजा बजाएर आउने कुरा होइन, यसको पूर्वतयारी जरुरी छ । तर हामीकहाँ भने सामान्य पूर्वतयारी पनि भएको देखिँदैन ।

अहिले हावाहुरी चल्न सुरु भइसकेको छ । यसै पनि जोडले हावाहुरी चल्ने ठाउँ हो मुस्ताङ । यो मौसममा आगजनीका घटना सबैभन्दा बढी हुन्छन् । सहरी क्षेत्रमा सडक साँघुरा छन् । गाउँका धेरै घरसम्म बाटोको पहुँच नै छैन । यो हावाहुरीको मौसममा आगलागीले धेरै धन र यदाकता जनको पनि नोक्सानी गर्ने गरेको छ ।

राणा प्रधानमन्त्री जुद्धशमशेर जबराका पालामा नेपालमा पहिलो पटक बारुणयन्त्र भित्र्याइएको थियो । सुरुमा काठमाडौँमा स्थापना भएको जुद्ध बारुणयन्त्रपछि ललितपुर र भक्तपुरमा पनि पुग्यो । अहिले पनि दमकलका पार्टपुर्जा नेपाली बजारमा नपाइने हुँदा बिग्रिएका दमकललाई मर्मत गर्न विदेशबाटै पार्टपुर्जा झिकाउनुपर्ने अवस्था छ । दमकल नयाँ भए पनि पार्टपुर्जा उपलब्ध हुन नसक्दा मर्मत हुन नपाएर थन्किएका छन् । अनुदानमा आएका कतिपय दमकलमा पनि प्रयोगमा आउनै सकेका छैनन् ।

फायर फाइटरहरुको पीडा पनि उस्तै छ । उनीहरुको पोशाक किन्न महंगो पर्ने भएकाले पुरानाले नै काम चलाइएको छ । आगोसँग जुध्नुपर्ने पेसाकर्मीलाई पुराना पोसाकबाट काम चलाउनु उचित होइन । यसरी विपदमा काम गर्ने जनशक्तिमा उत्साह, हौसला भर्नु जरुरी छ । मुस्ताङमा दमकल भएको भए आगलागीले ठूलो क्षति गर्ने थिएन ।

आगलागी कम गर्न सकिएला, निमिट्यान्न पार्न असम्भव छ । यसको अर्थ यो विपद् सामना गर्नैपर्छ । अहिले सहर बजारमा धेरैजसो विद्युट सर्ट भएर आगलागी हुने गरेको छ । सडकमा यत्रतत्र लापरवाही तवरले टाँगिएका तार सर्ट हुने सम्भावना बढी हुन्छ । व्यवस्थित विद्युतीकरणले यसलाई कम गर्न सक्छ ।

आगलागीबारे जनचेतना जगाउँदै कमसेकम जिल्लामा एउटा दमकलको व्यवस्था त गर्नैपर्ने हुन्छ । सम्भव भएसम्म एउटा पालिकाले एउटा दमकल किन्न जरुरी छ । आगलागीले सर्वनाश गर्न लाग्दा पनि जोगाउने उपाय नभएको स्थानीय सरकारलाई सरकार साच्चिकै सरकार मान्न सकिन्छ । मुस्ताङको आगलागीलाई वेवास्ता नगरौं, पाठ सिकेर पूर्वतयारी गरौं ।