पोखरा ।
अख्तियार दुरुपयोग अनुसन्धान आयोगको ३२ औं स्थापना दिवसको अवसरमा आयोगको पोखरा कार्यालयले शुक्रबार खुला रक्तदान आयोजना गरेको छ । कार्यक्रममा ४१ युनिट रगत संकलन भएको आयोगको पोखरा कार्यालयका प्रमुख पार्वती शर्माले जानकारी दिइन् ।

कार्यक्रममा सुरक्षा निकाय, पोखरा महानगरपालिका, नागरिक समाजका प्रतिनिधिको सहभागिता थियो । कार्यालय प्रमुख शर्माले संवैधानिक निकायको रुपमा रहेको आयोगले नेपालमा भ्रष्टाचार नियन्त्रण तथा सुशासन प्रवद्र्धनमा काम गर्ने बताइन् ।

संविधानको मर्मअनुसार आयोगले दण्डात्मक, निरोधात्मक, प्रर्वद्धनात्मक र संस्थागत क्षमता विकासका रणनीतिलाई अंगीकार गरी कार्यसम्पादन गर्दै आएको जानकारी दिइन् ।

आयोगले अख्तियार दुरुपयोग अनुसन्धान आयोग ऐन तथा नियमावली, भ्रष्टाचार निवारण ऐन, लगायतका प्रचलित कानुनी व्यवस्था र आयोगको काम कारवाहीसम्बन्धी कार्यविधि, निर्देशिका एवं मापदण्डमा आधारित भएर सदाचार, निष्पक्षता र निर्भिकताको सिद्धान्त अवलम्बन गरी कार्यसम्पादन गरेको उनले उल्लेख गरिन् ।

आयोगका पोखरा कार्यालयका सूचना अधिकारी राजु कुँवरले खुला रक्तदान, सरसफाइ, अन्तक्र्रिया लगायतका कार्यक्रम गरी आयोगको स्थापना दिवस मनाएको जानकारी दिए । उनले भ्रष्टाचार नियन्त्रणको प्रवद्र्धनात्मक कार्यक्रमको रुपमा स्थापना दिवस मनाएको बताए ।

स्थापना दिवसको सन्दर्भमा आयोगको कार्यालय, पोखरा कार्यालयले सेती नदी किनारामा सरसफाइ गरेको छ । नागरिक समाज कास्कीसँगको सहकार्यमा सेती नदीको तुल्सीघाटदेखि शान्तिघाटसम्मको सफाइ अभियानमा संकलित झण्डै १५ टन फोहरमैलालाई व्यवस्थापन गरिएको छ । पोखरा महानगरपालिकाका मेयर धनराज आचार्यले नगरवासीको सहभागिताबाट सुन्दरता र सौन्दर्यकरणको काम भएको बताए ।

‘घर घरमा फोहरमैला वर्गीकरण गरी व्यवस्थापन गरे महानगरको सरसफाइ अभियानलाई ठूलो सहयोग पुग्छ,’ मेयर आचार्यले भने, ‘घरदेखि मृत्यु संस्कार गर्ने थलोसम्मको सरसफाइले तुलसीघाट र शान्तिघाटलाई पवित्र राख्न सहयोग पुगेको छ ।’ मेयर आचार्यले रामघाट तथा शान्तिघाट व्यवस्थापनलाई बजेटसहित २ कर्मचारीको व्यवस्थापन गरेको जानकारी दिए ।

अख्तियार दुरुपयोग अनुसन्धान आयोग पोखरा कार्यालयका प्रमुख पार्वती शर्माले नदीनालाको सरसफाइ गरे जस्तै नेपालको सार्वजनिक प्रशासनको फोहोरलाई सफा गर्न सचेतनामूलक कार्यक्रम आवश्यक रहेको उल्लेख गरिन् । उनले सार्वजनिक सेवाको क्रममा आचरण विपरीत काम गर्नेलाई सार्वजनिक रुपमा बहिस्कार गर्नुपर्ने बताइन् ।

नागरिक समाज कास्कीका पूर्व संयोजक रामबहादुर पौडेलले सेती नदी सरसफाइका क्रममा रामघाट वरी परीको जीर्ण संरचना निर्माणका लागि पोखरा महानगरपालिकाका मेयर आचार्यलाई ध्यानाकर्षण गराइएको बताए । उनले सेती नदी वरीपरी फोहर मैला गर्नेलाई कानुनी कारवाहीको दायरा ल्याउन पहल गर्ने बताए ।

सरसफाइ अभियानमा पोखरा महानगरपालिका, जिल्ला प्रशासन कार्यालय कास्की, नेपाल प्रहरी, सशस्त्र प्रहरी बल, सरकारी कार्यालय तथा नागरिक संघ, संस्थाका प्रतिनिधिको सहभागिता थियो ।