काठमाडौं ।
कास्की क्षेत्र न. २ बाट निर्वाचित प्रतिनिधि सभा सदस्य विद्या भट्टराईले निर्माणाधीन पृथ्वी राजमार्गको मुग्लिङ पोखरा सडक खण्ड निर्माणमा भएको ढिलासुस्तीको सम्बन्धमा संसदको ध्यानाकर्षण गराएकी छन् ।

बुधबार प्रतिनिधि सभा बैठकको शून्य समयमा भट्टराईले सो सडक खण्डको करिब ९३ किमी एसियाली विकास बैंकको ऋण सहयोगमा ४ लेनमा स्तरोन्नति गर्न लागिए पनि समयमै काम हुन नसकेको बताइन् ।

विसं. २०७८ मा सम्झौता भई २०८१ मा निर्माण सम्पन्न हुनुपर्नेमा हालसम्म ५ प्रतिशतमात्रै काम भएकोमा उनले चिन्ता प्रकट गरिन् । सांसद भट्टराईले सो सडक समयमै सम्पन्न गर्न सडक किनाराका बिजुलीका पोल र खानेपानी विस्तारको काम मुख्य अवरोध बनेको सुनाइन् ।

जसका कारण कोत्रे पोखरा खण्डको काम सुरु नै हुन नसकेको उनले बताइन् । सडक निर्माणको कार्य प्रगति सन्तोषजनक नभएको तथा लाखौं यात्रु जोखिम पूर्ण यात्रा गर्न बाध्य भएको उनले उल्लेख गरिन् । सो सडक समयमा सम्पन्न गर्ने गरी कामअगाडि बढाउन उनले सरकारको ध्यानाकर्षण गराइन् ।