पोखरा ।
माछापुच्छ्र्रे हिमालको काखमा रहेको कास्कीको माछापुच्छ्रे गाउपालिका वडा नं. ४ को रमणीय गाउँ लाहाचोक प्रवद्र्धन गर्ने उद्देश्यले हाइकर्स क्लब नेपालको समूह शनिबार उक्त गाउँ पुगेको छ । स्वस्थ्य र पर्यटनका लागि हाइकिङ भन्ने नाराका साथ हरेक महिनाको अन्तिम शनिबार सञ्चालन हुँदै आएको एक दिने हाइकिङ को ३१ औं श्रृङखला लाहाचोक गाउँमा भएको छ ।

पोखरा २५ हेमजाको मिलन चोकमा भेला भई पैदल यात्रा सुरु गरेको उक्त समूहलाई क्लबका संयोजक कृष्ण रानाभाटले हाइकिङले स्वास्थ्य र पर्यटन प्रवद्र्धनमा सहयोग पुगेकाले छिट्टै विधिवत रुपमा दर्ता गरिने जानकारी दिए । २०७६ देखि नियमित रुपमा हुँदै आएको हाइकिङ कोरोना भाइरसका कारण केही महिना स्थगित भएको थियो ।

कोरोना भाइरसको असर कम भएपश्चात पुनः नियमित रुपमा हाइकिङ भइरहेको क्लबका सदस्य तथा कानुनी सल्लाहकार अधिवक्त नोज घर्तिमगर बताउँछन् । विद्यार्थीदेखि गृहणीसम्म सहभागी भई रमाइलो गर्दै पैदल हिडेर स्थानीय वस्ती, खोलानाला, वनजंगल, विभिन्न विकास, निर्माणका कार्यलाई प्रत्यक्ष रुपमा अवलोकन गर्दै ४ देखि ५ घण्टा सँगै हिड्नु नै हाइकिङको उद्देश्य रहेको सञ्चारकर्मी मधु अधिकारी बताउँछन् ।

व्यवसायी राजेन्द्र अधिकारीले हाइकर्स क्लबका सदस्यलाई लाहाचोकमा स्वागत गरे । उनले विभिन्न देवी देवताका मन्दिर, प्रचारप्रसारको पर्खाइमा रहेको पर्यटकीय पातीखोला गुफा, काल भैरव मन्दिर, नवनिर्मित माछापुच्छ्रे गाउँपालिकाको प्रशासनिक भवन, व्यावसायिक रुपमा गरिएका कृषि तथा पशु पालन अवलोकन गराएका छन् ।

यसअघि कास्की, स्याङ्जा र तनहुँका विभिन्न गाउँमा हाइकर्स समूह पुगिसकेको छ । फागुन महिनाको अन्तिम शनिबार स्याङ्जाको फेदीखोला गाउँपालिका वडा नं. ५ स्थित बाँगे गाउँमा जाने तयारी छ ।