म्याग्दी ।
म्याग्दीको प्रमुख धार्मिक पर्यटकीय स्थल बेनी नगरपालिका ९ स्थित प्रसिद्ध धार्मिकस्थल गलेश्वर मन्दिरमा एकै दिन ४ लाखभन्दा बढी भेटी संकलन भएको छ ।

महाशिवरात्री पर्वको अवसरमा शनिबार गलेश्वर शिवालयको दर्जन र पूजाआजा गर्न आएका भक्तजनबाट ४ लाख ३५ हजार ३७ भेटी संकलन भएको गलेश्वर शिवालय क्षेत्र विकास कोषका सदस्य सचिब बलबहादुर खत्रीले जानकारी दिए ।

मन्दिरमा भक्तजनले चढाएको भेटी आइतबार कोषका समिति, कर्मचारी, गलेश्वर बजारबासी, आमा समूह, सशस्त्र प्रहरी र नेपाल प्रहरीको उपस्थितमा गनिएको हो ।

भक्तजनले मुल मन्दिर लगायत विभिन्न स्थानमा चढाएको भेटीसँगै त्रिशूल चढाउनी, ग्रहशान्ति, रुद्री लगायतका पूजा गर्दा गरेको दानसार्वजनिक गरिएको कोषका सदस्य सचिव खत्रीले जानकारी दिए ।

प्रसिद्ध धार्मिकस्थल गलेश्वर मन्दिरमा महाशिवरात्रीको पर्वको अवसरमा दर्शन र पूजाआजाका लागि म्याग्दीका ग्रामीण भेगसँगै छिमेकी जिल्ला बागलुङ, पर्वत पोखरा, काठमांडौ लगायतका ठाउँबाट ३० हजारभन्दा बढी भक्तजन आएको कोषका अध्यक्ष माधवप्रसाद रेग्मी बताउँछन् ।

मुक्तिनाथ मन्दिरको प्रवेशद्वारमा रहेको गलेश्वरधाम हिन्दू धर्मावलम्बीको प्रसिद्ध तीर्थस्थल हो । गलेश्वरधामको दर्शन र पूजाआजा गरेमा सुख, शान्ति र समृद्धि हुने जनविश्वास छ ।