लेखनाथ ।
विभिन्न कारणबाट अभिभावक विहीन भएका बालबालिकाका लागि संस्थागत संरक्षण आवश्यक भएकोमा जोड दिइएको छ । नेपाल बाल संगठन कास्कीले आयोजना गरेको बालगृहको आवस्यकता, अवस्था र चुनौती विषय अन्तरक्रियाका सहभागीले अभिभावक विहीन बालबालिकाको उचित रुपमा संरक्षण गर्नका लागि राज्यको तर्फबाट नीतिगत योजना आउनुपर्नेमा जोड दिए ।

उनीहरुलाई उचित रुपमा संरक्षण गर्न सकिएन भने त्यसको भार राज्यलाई पर्ने उनीहरुले औंल्याए । पोखरा महानगरपालिका सामाजिक विकास समिति संयोजक तथा वडा नं १७ की वडाध्यक्ष राधिका शाही योगीले राज्यका नीति र कानुन नै फितलो हुँदा दिन प्रतिदिन अभिभावक विहीन बालबालिकाको सख्या बढ्दै गएको दाबी गरिन् ।

यसलाई कसरी कम गर्न सकिन्छ भन्ने विषयमा विज्ञ र सरोकारवालाबीच गम्भीर विमर्श आवश्यक भएको उनको भनाइ छ ।
नेपाल बाल संगठन कास्की अध्यक्ष वामदेव ढुंगानाको अध्यक्षतामा भएको कार्यक्रममा बाल अधिकार परिषद समन्वय अधिकृत बद्रिप्रसाद वाग्ले, नेपाल बाल संगठन कास्की सचिव प्रभा भुजेल, उपाध्यक्ष रामहरि ढुंगाना लगायतले बोलेका थिए ।