सञ्जय रानाभाट, पोखरा ।
काठमाडौं–पोखरा रुटमा अब रात्रिकालीन उडान हुने भएको छ । यसअघि पोखरामा रात्रिकालीन उडानको सुविधा थिएन । जनवरी १ बाट सञ्चालनमा आएको पोखरा क्षेत्रीय अन्तर्राष्ट्रिय विमानस्थलमा हाल बुद्ध, यती, श्री, सौर्य, श्री, गुण लगायतका वायुसेवाले आन्तरिक उडान गर्दै आएका छन् ।

आन्तरिक उडानतर्फ बिहानदेखि सुरु भए पनि दिउँसो ४ बजे विमानस्थल बन्द गर्नुपर्ने अवस्था छ । रात्रिकालीन उडानसँगै यो अवस्था अन्त्य हुने पोखरा विमानस्थलकी प्रवक्ता जशोदा रेग्मीले बताइन् । बुद्ध एयरका प्रवक्ता दीपेन्द्र कर्णका अनुसार पोखरा काठमाडौं रात्रिकालीन उडान फागुन २५ गतेबाट सुरु हुनेछ ।

‘विमानस्थलले म्याचुरिटी पिरियड पार गरेसँग बुद्धले मार्च ९ गतेबाट रात्रिकालीन उडान गर्छ,’ प्रवक्ता कर्णले भने, काठमाडौंबाट पोखरा गएर ४ वटा वुद्धका विमान बास बस्छन् ।’ बुद्धले बेलुका ८ बजेसम्म उडान गर्ने कर्णले बताए । ‘अहिले दिउँसो ४ बजेसम्म उडान गरेको छ । अब काठमाडौं—पोखरा बेलुका ८ बजेसम्म गर्छौं,’ उनले भने ।

रात्रिकालीन उडान सुरु भएपछि ढिलो भएका उडान सहज हुने विमानस्थल प्रवक्ता जशोदा रेग्मीले सुनाइन् । ‘रात्रिकालीन उडान सुरु भए डिले भएका उडान पनि नियमित हुन्छ,’ प्रवक्ता रेग्मीले भनिन्, ‘नयाँ विमानस्थलको सुविधा पनि उपयोग रात्रिकालीन उडानसँगै हुन्छ ।’

यसअघि नागरिक उड्डयन प्राधिकरणले फेब्रुअरी २३ बाट पोखरा अन्तर्राष्ट्रिय विमानस्थलबाट अन्तर्राष्ट्रिय उडान गर्ने घोषणा गरेको थियो । सोही दिनबाट रात्रिकालीन उडान हुने प्राधिकरणले जनाए पनि अहिलेसम्म तालिका सार्वजनिक हुन सकेको थिएन । तर, केही समय ढिला गरी रात्रिकालीन उडानको तालिका बुद्ध एयरलाइन्सले सार्वजनिक गरेको हो ।

रात्रिकालीन र अन्तर्राष्ट्रिय उडान दुवैको तयारी भइसकेको विमानस्थल प्रमुख विक्रम गौतमले बताए । ‘फेब्रुअरी म्याचुरिटी पिरियडका लागि मात्र कुरेका हौं । यो पनि पूरा भइसक्यो । विमानस्थललाई चाहिने इकुप्मेन्ट, डकुमेन्ट र स्रोतहरू पूरा भइसके,’ उनले भने । पोखरा विमानस्थल इन्स्टुमेन्ट फ्लाइट रुल्स (आइएफआर) फेब्रुअरी २३ बाट लागू हुन्छ ।

योसँगै रात्रिकालीन र अन्तर्राष्ट्रिय उडानका लागि विमानस्थलको म्याचुरिटी पिरियड पुग्छ । फ्लाइट प्रमाणित नेपाल नागरिक उड्डयन प्राधिकरणले चेक जाँच गरेर रात्रिकालीन उडान गर्न अनुमति दिएको हो । प्राधिकरणले बुद्धलाई अनुमति दिइसकेको बुद्ध एयरलायसन्का प्रवक्ता कर्णले बताए ।

अन्तर्राष्ट्रिय विमानस्थलनजिकै माघ १ गते यति एयरलाइन्सको विमान दुर्घटनापछि उडान हुने÷नहुने अन्योल थियो । बुद्धको तालिका सार्वजनिक भएसँगै पोखराका पर्यटन व्यवसायी उत्साहित छन् । उनीहरुले रात्रिकालीन उडान भएसँगै पर्यटनको आगमन पनि बढ्ने विश्वास व्यक्त गरे ।

यता, विमानस्थल प्रमुख गौतमले विमानस्थल राम्रो बनेको तर प्रमोसन नभएको बताए । उनले विमानस्थलबाट छिट्टै अन्तर्राष्ट्रिय उडान पनि हुने विश्वास जनाए । भारतबाट उडानको अनुमती आए बुद्धले ३ उडान गर्ने जनाएको छ ।

पोखरा विमानस्थलबाट अन्तर्राष्ट्रिय उडानतर्फ बुद्ध एयरले भारतका ३ गन्तव्य पोखरा–बनारस–पोखरा, पोखरा–दिल्ली–पोखरा र पोखरा–देहरादुन–पोखरामा उडान गर्ने योजना बनाएको हो । पोखराबाट अन्तर्राष्ट्रिय उडान गर्न कोरियन एयर, बिज एयर, हिमालय, नेपाल वायुसेवा निगम लगायतको चासो देखाएको प्राधिकरणले जनाएको छ ।