पोखरा ।
पोखराका उद्योगी/व्यवसायीले बैंक तथा वित्तीय संस्थाले ज्यादती गरेको भन्दै सडकमा उत्रिने भएका छन् । पोखरा तथा लेखनाथ उद्योग वाणिज्य संघको आयोजनामा बिहीबार उद्योगी/व्यवसायी सडकमा ओर्लन लागेका हुन् ।

पोखरा उद्योग वाणिज्य संघका अध्यक्ष पवनकुमार प्रजापतिका अनुसार बैंक तथा वित्तीय संस्थाबाट कर्जामा गरिएको ब्याज वृद्धि, धरपकड एवं मानसिक आतंकको विरोधमा बिहीबार चिप्लेढुंगा चोकमा शान्तिपूर्ण विरोध प्रदर्शन आयोजना गरिएको छ ।

संघका वरिष्ठ उपाध्यक्ष गोकर्ण कार्कीले बिहान १० बजेदेखि मध्यान्ह १२ बजेसम्मको विरोध प्रदर्शनमा पोखरामा रहेका विभिन्न वस्तुगत संघको पनि सहभागिता रहने जनाए ।

निजी क्षेत्रको मागको सुनुवाइ नभएसम्म विरोधका कार्यक्रम जारी रहने र आवश्यक परे काठमाडौं नै पुगेर विरोध प्रदर्शन गरिने पनि उनले सुनाए ।