म्याग्दी ।
म्याग्दीको बेनी नगरपालिकालाई युएनडिपीद्वारा निर्मित सप्टवेयर हस्तान्तरण भएको छ । बेनी नगरपालिका क्षेत्रभित्रका संकटापन्न घरधुरीको सामाजिक–आर्थिक सूचना व्यवस्थापन प्रणाली कार्यक्रममार्फत तथ्यांक संकलन गर्न सप्टवेयर हस्तान्तरण गरिएको हो ।

उक्त सप्टवेयर युएनडिपीका प्रोजेक्ट कोअर्डिनेटर सतीस पाण्डे र आरबिएम एनालिस्ट दिनेश विष्टले बेनी नगरपालिकाका प्रमुख सुरत केसी र उपप्रमुख ज्योति लामिछानेलाई हस्तान्तरण गरेका हुन् । सोही अवसरमा प्रिन्टर मेसिन, क्युआर कोर्डसहित कार्ड पनि हस्तान्तरण गरिएको छ ।

सप्टवेयर तथा सामग्री ग्रहण गर्दै नगर प्रमुख केसीले बेनी नगरपालिकाको सबै वडामा पुगेर नगरवासीको तथ्यांक संकलन गरिने बताए । नगर प्रमुख केसीले नगरपालिकाको वडास्तरमा पुगेर तथ्यांक संकलन गरी सफ्टवेयरमा इन्ट्री गरिसकेपछि वस्तीस्तरको वास्तविक समस्या तथा अवस्थाको पहिचान गरी समाधान गर्न सहज हुने बताए ।

उनले सफ्टवेयरमा समग्र नगरवासीको शैक्षिक, आर्थिक, सामाजिक, रोजगारी, अन्य पेशा तथा व्यवसाय लगायतको अवस्थाबारे तथ्यांक संकलन गरिने बताउँदै ज्येष्ठ नागरिक तथा दीर्घरोगीहरुको स्वास्थ्य अवस्था र उनीहरुले नियमित प्रयोग गर्ने औषधीको विषयमा समेत तथ्यांक संकलन गरी सफ्टवेयरभित्र इन्ट्री गरिनेछ ।

बेनी नगरपालिकाका उपप्रमुख लामिछानेले स्वागत गरेको कार्यक्रम सामाजिक आर्थिक संकटापन्न सूचना व्यवस्थापन प्रणाली कार्यक्रमका कार्यक्रम संयोजक भरत केसीको सञ्चालनमा सम्पन्न भएको थियो । युएनडिपी र बेनी नगरपालिकाको साझेदारी तथा संगम म्याग्दीको समन्वय र व्यवस्थापनमा नगर क्षेत्रमा तथ्यांक संकलन गर्न लागिएको बेनी नगरपालिकाले जनाएको छ ।

सफ्टवेयर हस्तान्तरणपछि तथ्यांक संकलनमा खटिने स्वयंसेवकहरु, संगम म्याग्दीको आन्तरिक जनशक्तिसहित २७ जनालाई सहजीकरण गरिएको थियो । उक्त कार्यक्रममा युएनडिपीका प्रोजेक्ट कोअर्डिनेटर पाण्डे र आरबिएम एनालिष्ट विष्टले सहजीकरण गरेका थिए ।

कार्यक्रममार्फत आम नगरवासीलाई आफ्नो यथार्थ सूचना र विवरणहरु दिएर सहयोग गर्न आह्वान गरिएको छ । युएनडिपी, संगम म्याग्दी र बेनी नगरपालिकाको सहकार्यमा सञ्चालन हुने तथ्यांक संकलन कार्यक्रमबाट नगरवासीको वास्तविक अवस्था पत्ता लगाउन र आगामी आर्थिक वर्षको वार्षिक नीति, कार्यक्रम र बजेट निर्माणमा सहयोग पुग्ने अपेक्षासमेत गरिएको छ ।