पोखरा ।
बाल हितकारी परियोजना नेपालले सामुदायिक विद्यालयका शिक्षकलाई सहजीकरण औजार उत्पादन, तथा प्रस्तुतिकरण सीप सम्बन्धी तालिम दिएको छ । दातृ संस्था किडासाकाे सहयाेगमा सञ्चालित जीवन उपयोगी सीप शिक्षा कार्यक्रम अन्तर्गत तीन चरणमा भएको तालिममा ३० विद्यालयका ६० जना शिक्षकको सहभागिता रहेको संस्थाका अध्यक्ष गोविन्दराज पहारीले जानकारी दिए ।

अध्यक्ष पहारीले जीवन उपयोगी सीप शिक्षा कार्यक्रमलाई पोखरा महानगरपालिकाले स्थानीय पाठ्यक्रममा समावेश गरेको जानकारी दिए । ‘सन २०२२ देखि पोखरा महानगरका ६० सामुदायिक विद्यालयका विद्यार्थीलाई जीवन उपयोगी शिक्षा प्रदान गर्दै आएको छ,’अध्यक्ष पहारीले भने, ‘हप्तामा कक्षा ( ५८ सेसन)सञ्चालन पढाई हुने कार्यक्रमबाट १ हजार ८ सय ४८ बाल बालिका लाभान्वित भएका छन् ।’ उनले ज्ञान जती बांड्यो त्यति बढ्ने भएकोले तालिमको सदुपयोग गर्न आग्रह गरे ।

संस्थाका कार्यकारी निर्देशक ठाकुर चापागाईले सम्पर्क शिक्षकबाट जीवन उपयोगी सीप शिक्षाको नियमित कक्षा सञ्चालन गरेको जानकारी दिए । उनले पोखरा महानगरपालिकाले स्थानीय पाठ्यक्रमको रुपमा समावेश गरेको कार्यक्रमलाई कास्कीका अन्य गाउँपालिकाले सिको गर्नु पर्ने बताए ।

प्रशिक्षक भक्तराज रसाइलीले सहजीकरण गरेको तालिम समापन समारोहमा कार्यक्रम संयोजक संगीता भण्डारी, शिक्षकहरु जगदिश सुवेदी र प्रभा लम्सालले तालिमले शिक्षण सिकाई क्रियाकलापमा सहयोग पुगेको उल्लेख गरे ।