पोखरा ।
बाल विधा मन्दिर इङ्लिस बोर्डिङ स्कुलले ३७ औं वार्षिकोत्सव तथा अभिभावक दिवस मनाएको छ । व्यावहारिक र गुणस्तरीय शिक्षा प्रदान गर्ने उद्देश्यका साथ २०४२ मा स्थापना भएको विद्यालयले शनिबार विविध कार्यक्रम गरी वार्षिकोत्सव तथा अभिभावक दिवस मनाएको हो ।

समारोहमा शिक्षा विकास तथा समन्वय इकाइ कास्की प्रमुख नारायणप्रसाद सुवेदीले विद्यालयकोे शैक्षिक गुणस्तर वृद्धि र प्रभावकारी बनाउन एकल प्रयासले मात्र सम्भव नहुने उल्लेख गरे । उनले अभिभावक, शिक्षक र विद्यार्थी बचिमा सहकार्य हुन आवश्यक रहेको बताए ।

विद्यालयले वार्षिकोत्सवको छेको पारेर शिक्षाविद् डाक्टर गेहेन्द्रमान उदासलाई अभिनन्दन गरेको छ । शैक्षिक क्षेत्रमा उदासले गरेका योगदानको कदर गर्दै अभिनन्दन गरिएको प्रधानाध्यापक कमल गुरुङले बताए । समारोहमाले गुरुङले वार्षिक प्रगति प्रतिवेदनसमेत प्रस्तुत गरेका थिए ।

विद्यालयका निर्देशक राम गुरुङको अध्यक्षतामा भएको कार्यक्रममा विद्यार्थी बिबिसा पौडेलले पनि बोलेकी थिइन् । विभिन्न अतिरिक्त तथा शैक्षिक क्रियाकलापमा उत्कृष्ट हुने विद्यार्थीलाई पुुरस्कार गरिएको कार्यक्रममा भूतपूर्व विद्यार्थीलाई सम्मान गरिएको थियो ।