पोखरा ।
गण्डकी प्रदेशका उपसभामुख विनाकुमारी थापाका स्वकीय सचिव प्रकाश शर्माले असहाय एवं दीर्घरोगीलाई आर्थिक सहयोग गरेका छन् । शर्माले आइतबार ५ जना विपन्न एवं दीर्घरोगीलाई आर्थिक सहयोग गरेका हुन् ।

स्वकीय सचिव शर्माले आफ्नो प्रत्येक महिनाको मासिक पारिश्रमिकबाट केही रकम निरन्तर सामाजिक सेवामा खर्च गर्ने बताए । उनले भने, ‘मेरो मासिक पारिश्रमिकमध्येबाट प्रत्येक महिना ५ जना विपन्न, असहाय एवं दीर्घरोगीलाई उपचारमा सहयोग पुगोस् भन्ने उद्देश्यले निरन्तर सहयोग गर्ने प्रतिबद्धता व्यक्त गर्दछु ।’

स्वकीय सचिव शर्माले पहिलो महिनाको तलबबाट माछापुच्छ्रे गाउँपालिका वडा नम्बर ३, घाचोक निवासी दुवै मृगौला फेल भई उपचाररत ५० वर्षीया बुद्धिमाया नेपालीलाई १ हजार रुपैयाँ नगद सहयोग गरेका हुन् ।

त्यस्तै आइतबार पोखरा ९ सुकुम्वासी बस्तीमा बस्ने क्यान्सर पीडित दुबै खुट्टा नभएका ४५ वर्षँका कृष्ण परियारलाई आर्थिक सहयोग स्वरुप १ हजार सहयोग गरेका छन् ।

पोखरा ९ पार्वती टोलमा बस्ने लामो समयदेखि पाटे घरको क्यान्सरबाट पीडित ५५ वर्षीया चन्द्रकुमारी पाण्डे, पोखरा ९ शान्तिवन निवासी नसासम्बन्धी रोगबाट पीडित ७० वर्षीया देवी लामा र सोही स्थानका बस्ने शारीरिक रुपमा अपांगता भएकी १९ वर्षकी रूपा परियारलाई समान एक, एक हजार आर्थिक सहयोग गरेका छन् । रुपा परियारका आमा र दाइको गत वर्ष क्यान्सरका कारण मृत्यु भएको थियो ।