पोखरा ।
चलचित्र पत्रकार संघ नेपाल कास्कीका संस्थापक उपाध्यक्ष नवीन घायलसँग संघको वर्तमान कार्यसमितिले साक्षात्कार गरेको छ । कार्यक्रममा घायललाई सम्मानसमेत गरिएको छ ।

चलचित्र पत्रकार संघ कास्कीको स्थापनामा महत्वपूर्ण भूमिका खेलेकोमा संघले उनलाई दोसल्ला, प्रमाणपत्र र मालासहित सम्मान गरेको हो । कार्यक्रममा घायलले संघको स्थापन कालमा आफूहरुले गरेका संघर्षका दिन सम्झिए ।

तत्कालीन समयमा पोखरामा हुने चलचित्र सम्बन्धि गतिविधिका विषयमा नछुटाई लेख्ने पत्रकारमध्ये पर्छन् घायल । सिनेमाका विषयमा लेख्दा लेख्दालेख्दै अभिनयमा समेत उनको सक्रियता बढ्दै गयो ।

घायल हाल अस्ट्रेलियामा बस्छन् । घरदेश छाडेर परदेश गएपछि पनि चलचित्रसम्बन्धी गतिविधिमा उनको सक्रियता पाइन्छ । अस्ट्रेलियामा समेत नेपाली चलचित्र विषयमा विविध कार्यक्रम आयोजना गर्ने गरेका छन् ।

चलचित्र पत्रकारिता र नेपाली चलचित्र क्षेत्रप्रतिको माया आफूलाई अझै पनि लाग्ने गरेको अभिव्यक्ति उनको छ । चपस कास्कीको संस्थापक उपाध्यक्ष भएर आफूले गरेका कामले नै सफलता दिलाएको अनुभूति उनी सुनाउँछन् ।

संस्थापक अध्यक्ष श्रीराम सिग्देलले चलचित्र पत्रकार संघ कास्कीको स्थापना कालमा घायलको सक्रियताले आफूलाई सहयोग मिलेको बताए । संस्थापक पदाधिकारी र सदस्यलाई चपस कास्कीको वर्तमान कार्यसमितिले गरेको सम्मान सराहनीय भएको भनाइ उनको छ ।

संघका पूर्वअध्यक्ष अरुण गिरीले संघका अग्रजसँग साक्षत्कार कार्यक्रम गरी संस्थाले नवीन कार्य सुरुआत गरेको बताउ । यसले संस्थापक पदाधिकारी र सदस्यलाई पनि संघप्रति अपनत्व हुने विश्वास उनको छ ।

संघका अध्यक्ष प्रभु अधिकारीले चपस कास्कीलाई आजको दिनसम्म ल्याउन महत्वपूर्ण भूमिका खेल्ने संस्थापक उपाध्यक्ष घायललाई सम्मान गर्न पाउँदा खुसी लागेको बताए । संस्थापक पदाधिकारी र सदस्यहरुको साथ मिल्नेमा उनी विश्वस्त छन् ।

कार्यक्रममा संस्थाका सल्लाहकार सुरेश रानाभाट र संस्थाका शुभचिन्तक सोभित बस्यालले घायललाई सम्मान गरेर चपस कास्कीले संस्थाको मर्यादालाई माथि उठाएको बताए ।