पोखरा ।
लायन्स क्लब इन्टरनेसनल २२५ केको प्रथम वार्षिक सम्मेलन शनिबार पोखरामा हुने भएको छ । पोखरा सभागृहमा हुने सो सम्मेलनमा देशभरका करिब १ हजार ५ सय लायनको सहभागिता रहने क्लबका गर्भर राजेन्द्रकुमार बाटाजूले बताए ।

वार्षिक सम्मेलन गण्डकी प्रदेशका मुख्यमन्त्री खगराज अधिकारीले उद्घाटन गर्ने तय छ । लायन्स क्लबका सदस्यका लागि वार्षिक सम्मेलन महान पर्व भएको बताउँदै उनले सम्मेलनको सम्पूर्ण तयारी पूरा भएको बताए । ‘सम्मेलनको सबै तयारी सकिएको छ,’ उनले भने, ‘सम्मेलनले पोखराको पर्यटन प्रवद्र्धनमा पनि योगदान गर्नेछ ।’

सम्मेलन उद्घाटनअघि चिप्लेढुंगाको मानवअधिकार चोकबाट पोखरा सभागृहसम्म परेड आयोजना गरिने भएको छ । क्लबका कन्भेनर टीकाराम सापकोटालेसम्मेलन भव्य बनाउन कुनै कसर बाँकी नराखिएको बताए । ‘प्रथम सम्मेलन सम्पन्न गर्न हामीले २१ विभिन्न विषयगत समिति बनाएका छौँ,’ उनले भने, ‘हाम्रो डिस्ट्रिक्ट ३२५ के मा आवद्ध १ सय ५७ क्लबका सदस्य सबै उत्साहित हुनुहुन्छ ।’

सम्मेलन रजिस्ट्रेसन समितिका संंयोजक वसन्त गिरीले सहभागिताका लागि नाम दर्ता हुने क्रम जारी भएको जनाए । क्लबका कोकन्भेनर श्यामकृष्ण श्रेष्ठका अनुसारसम्मेलनको पूर्वसन्ध्यामा हुने परेडमा लाखे नाच, पञ्चेबाजा पनि समावेश गरिएको छ ।

कन्भेनर सापकोटाका अनुसार प्रथम सम्मेलनले लायन वर्ष २०२३/०२४ का लागि नयाँ नेतृत्व चयनसमेत गर्नेछ । लायन वर्ष २०२३/०२४ का लागि डिस्ट्रिक्ट गभर्नरमा लायन सुचित्रा थापा, प्रथम भाइस डिस्ट्रिक्ट गभर्नरमा लायन निरा बज्राचार्य र द्वितीय डिस्ट्रिक्ट भाइस गभर्नरमा दुर्गाप्रसाद हुमागाईंको आधिकारिक उम्मेदवारी दर्ता भइसकेको छ ।

‘उम्मेदवारी दर्ता भनेको प्रक्रिया हो, उहाँहरुका अरु प्रतिस्पर्धी हुनुहुन्न’, उनले भने, ‘लायनहरु विधिमा विश्वास गर्छन्, निर्वाचन भनको विधि हो र उहाँहरु त्यसको लागि मैदानमा आउनुभएको हो । उहाँहरुले निर्वाचनमार्फत् शत्प्रतिशत मत प्राप्त गर्नुहुनेछ ।’