जोमसोम–हिमाली जिल्ला मुस्ताङको जोमसोममा अवस्थित एक मात्र तेज निरला जनहित बहुमुखी क्याम्पसमा बाम लोकतान्त्रिक गठबन्धन प्यानलले ‘क्लीन स्वीप’ गरेको छ ।
आईतबार साँझ जोमसोम स्थित नवनिर्मित क्याम्पस भवनमा सम्पन्न भएको स्ववियुको मतपरिणाम सार्वजनिक गरिएको छ । मतपरिणाम अनुसार प्रत्यक्षतर्फ बाम लोकतान्त्रिक गठबन्धनको प्यानलका तर्फबाट एकिकृत समाजवादी निकट अनेरास्ववियुले अध्यक्ष पदसहित ३ पदमा बिजयी हासिल ग¥यो । नेपाली कांग्रेस निकट नेपाल नेविसंघले ३ पदमा विजयी हासिल ग¥यो ।समानुपातिकतर्फ नेबिसंघले ४ पद र एमाले निकट अनेरास्ववियुले १ पदमा बिजयी हासिल गरेको स्ववियु निर्वाचन अधिकृत अदितीयचन्द्र थकालीले जानकारी दिए ।

क्याम्पसको स्ववियु निर्वाचनका लागि प्रत्यक्षतर्फ ६ जना र समानुपातिक तर्फ ५ जना स्ववियु पदाधिकारीका लागि आईतबार निर्वाचन भएको हो ।
मुस्ताङको तेज निरला जनहित बहुमुखी क्याम्पसको स्ववियुको अध्यक्ष पदमा एकिकृत समाजवादी निकट अनेरास्ववियुकी अमीशा तिलिजा बिजयी भएकी छिन् । कुल ४२ जना मतदाता मध्ये ३७ जनाले मतदान गरेका थिए । अध्यक्ष पदमा अनेरास्वियुका अध्यक्ष पदका उम्मेदवार एलिस थकाली र एकिकृत समाजवादी निकट अनेरास्ववियुकी तिलिजाले समान १८/१८ मत प्राप्त गरेका थिए । एक बदर भएको थियो । दुबै उम्मेदवारको मत बराबरी भएपछि स्ववियु निर्वाचन कमिटीले गोलाप्रथाबाट अध्यक्ष पदमा एकिकृत समाजवादी निकट तिलिजालाई बिजयी भएको घोषणा गरेको थियो ।
यसअघि स्ववियु निर्वाचनका लागि सचिव र कोषाध्यक्ष पदमा उम्मेदवारी दिएका एमाले निकट अनेरास्ववियुका दुई जनाले मनोनयनपत्र फिर्ता लिएपछि नेबिसंघका सचिव पदकी उम्मेदवार रविना गुरुङ र कोषाध्यक्ष पदका असिम थकाली निर्विरोध निर्वाचित भएका थिए ।