काठमाडौं ।
पोखरामा दुर्घटना भएको यति एयरलाइन्सको विमानका चालक दल ४ सदस्यका परिवारले सामाजिक सुरक्षा कोषबाट पेन्सन पाएका छन् । कोषले सञ्चालन गरेको योगदानमा आधारित सामाजिक सुरक्षा योजनामा आवद्ध चालक सदस्यका परिवारले पेन्सन रकम पाएको कोषले जनाएको हो ।

यती एयरलाइन्सको एटीआर–७२ विमानका क्याप्टेन कमल केसी र अञ्जु खतिवडा, विमान परिचारिका ओशिन आलेमगर र सृजना हुन्चुङको दुर्घटनामा निधन भएको थियो ।

माघ १ गते भएको दुर्घटनामा निधन भएका क्याप्टेन केसीले यतिमा आधारतभूत पारिश्रमिक ४२ हजार ५ सय पाउँथे । उनकी श्रीमती सिलु थापा क्षेत्रीले केसीले खाइपाई आएको आधारतभूत तलबको ६० प्रतिशतका दरले हुने २५ हजार ५ सय रुपैयाँ मासिक रुपमा पेन्सन पाएकी छन् । क्षेत्रीले यो रकम बाचुञ्जेल पाउने छिन् ।

केसीका छोरा आर्यनले बाबुले खाइपाइ आएको आधारभूत तलबको ४० प्रतिशत १७ हजार रुपैयाँ मासिक पाएका छन् ।

आर्यनले भने १८ वर्षसम्म यो सुविधा पाउनेछन् । उनले अध्ययनलाई २२ वर्षसम्म निरन्तरता दिए भने यो सुविधा २२ वर्षसम्मै उपलब्ध हुनेछ ।

क्याप्टेन अञ्जु केसीको आधारतभूत मासिक ३५ हजार थियो । उनका श्रीमान सुवासले अञ्जुले खाइपाइ आएको तलबको ६० प्रतिशत अर्थात् २१ हजार पेन्सन जीवनभर पाएका छन् । अञ्जुका छोरा श्रेयानले पनि आमाले पाएको मासिक पारिश्रमिकको ४० प्रतिशतले हुने १४ हजार रकम १८ वर्षसम्म पाउनेछन् ।

विमान परिचारिका सिर्जना हुन्चुङले मासिक आधारभूत पारिश्रमिक १२ हजार पाउँथिन् । उनी अविवाहित भएकाले उनका बुवा रिमबहादुर र आमा खिमसराले दामासाहीमा छोरीले पाएको आधारभूत मासिक पारिश्रमिकको ६० प्रतिशतले हुने ७ हजार २ सय रुपैयाँ बाचुञ्जेल पाउनेछन् ।

अर्की विमान परिचारिका ओसिन आलेमगरको आधारभूत पारिश्रमिकको ६० प्रतिशत ६ हजार २४४ रुपैयाँ उनका बुवा मोहनकुमार लामा र आमा सवनम आलेमगरले दामासाहीमा जीवनभर पाउनेछन् ।