तनहुँ क्षेत्र नम्बर १ मा हुने उपनिर्वाचनका लागि उम्मेदवार बन्न नेपाली कांग्रेसका १३ जनाले आकांक्षा देखाएका छन् ।

तनहुँ १ मा गत मंसिर ४ मा भएको चुनावमा तत्कालीन कांग्रेस नेता रामचन्द्र पौडेल विजयी भएका थिए । गत फागुन २५ गते पौडेल राष्ट्रपति भएपछि यो क्षेत्र रिक्त छ ।

कांग्रेस तनहुँ क्षेत्रीय कार्यसमितिले उम्मेदवारीमा आकांक्षा राख्नेहरुलाई आवेदन आह्वान गरेको थियो । आवेदन शुल्क ६ हजार रुपैयाँ तोकिएको थियो ।

केन्द्रीय सदस्य गोविन्द भट्टराई, पूर्वजिल्ला सभापति रघुनाथ पौडेल, महाधिवेशन प्रतिनिधि रामचन्द्र अधिकारी, नेविसंघ पूर्वमहामन्त्री दीपक भट्टराईले उम्मेदवार हुन आवेदन दिएको क्षेत्रीय कार्यसमितिले जनाएको छ ।

नेताहरू लक्ष्मी आचार्य, विष्णु पन्त, पूर्वजिविस सभापति रामचन्द्र पोखरेल, क्षेत्रीय सभापति श्याम मौरती, तनहुँ उपसभापति देवकुमार श्रेष्ठ, समुन्द्र गोदार, डोबाटे विश्वकर्मा, अर्जुन अधिकारी र सरिता गुरूङले उम्मेदवार बन्न आकांक्षा व्यक्त गरेका छन् ।

उनीहरुले क्षेत्रीय समितिले तोकेको शुल्क बुझाएर उम्मेदवार बन्न आवेदन गरेका हुन् ।