लेखनाथ ।
गण्डकी प्रदेश सरकार मातहत रहेको संक्रामक तथा सरुवा रोग अस्पताल पोखरा ३० मोहोरियामा पहिलो पटक हाइड्रोसिलको शल्यक्रिया गरिएको छ । माछापुच्छ्रे गाउँपालिका वडा नं. ६ का ६० वर्षीय पुरुषको आइतबार शल्यक्रिया भएको हो ।

हाइड्रोसिलको समस्याबाट पीडित ती पुरुषको शल्यक्रियाको माध्यमबाट उपचार गरिएको डा. सन्दीप ओझाले जानकारी दिए ।

हात्तीपाइले रोग पहिचान, रोकथाम नियन्त्रण तथा उपचार कार्यक्रम अन्तर्गत निशुल्क रुपमा शल्यक्रिया गरिएको हो ।

अस्पतालका कार्यकारी निर्देशकसमेत रहेका डा. विकास गौचन, डा. सन्दीप ओझा, नर्स नम्रता बाँस्तोला र सुनिता रेग्मीको टिमले शल्यक्रिया गरेको हो ।

शल्यक्रियापछि बिरामीको अवस्था सामान्य छ । उनलाई केही दिनको निगरानीपछि डिस्चार्ज गरिने अस्पताल स्रोतले जनाएको छ ।