पोखरा ।

कास्कीको घलेल गाउँमा चलचित्र पत्रकारिता कार्यशाला सम्पन्न भएको छ ।

चलचित्र पत्रकार संघ कास्कीको आयोजनामा २०७९ चैत २० र २१ गते दुई दिनसम्म चलेको कार्यशालामा कन्टेन्ट राइटिङ, रिभ्यु र गसिपमा आधारित रहेर प्रशिक्षण दिइएको संयोजक सुरेश सुनारले बताए ।

पोखराको विभिन्न मिडियामा आबद्ध ५० भन्दा बढी पत्रकारहरुको कार्यशालामा पत्रकार नारायण अमृत, सुरेश रानाभाट र केशवशरण लामिछानेले प्रशिक्षण दिएका हुन् ।

कार्यशालाको पहिलो दिन घलेल सामुदायिक होमस्टे र समग्र माछापुच्छ्रे गाउँपालिकाको पर्यटन क्षेत्रलाई सिनेमा मार्फत कसरी टेवा पुर्‍याउन सकिन्छ भन्ने विषयमा परिचर्चा कार्यक्रमको समेत आयोजना गरिएको थियो ।

कार्यक्रममा प्रमुख अतिथि माछापुच्छ्रे गाउँपालिकाका अध्यक्ष मीनबहादुर गुरुङले चलचित्र पत्रकारिता मार्फत घलेल गाउँको पर्यटन प्रवर्द्धनमा सघाउ पुग्ने अपेक्षा रहेको बताए ।

उनले गाउँपालिकामा भएका छायाँकनस्थललाई संरक्षण गर्दै सिनेमा छायाँकनलाई बढवा दिन सहज नीति निर्माण गर्ने तर्फ जोड गरिने उल्लेख गरे ।

गाउँपालिका वडा नम्बर ८ का अध्यक्ष राम गुरुङले सम्भावना भएर पनि प्रचारको अभावले घलेल गाउँ पछाडि परेको जानकारी गराए । उनले घलेल गाउँको प्रवर्द्धनका लागि बेलाबखत यस्ता कार्यक्रमहरु भइराख्नुपर्ने धारणा राखे ।

फिल्म मार्फत विविध विषयवस्तुहरु पस्किन सक्ने हुँदा यसको महत्वपूर्ण भूमिका रहेको भनाई उनको छ । चलचित्र पत्रकार संघका केन्द्रीय अध्यक्ष समीर बलामीले चलचित्र पत्रकारिता क्षेत्रलाई विस्तार गर्न संघ लागि परेको बताए ।

चलचित्र पत्रकारहरुले पेसागत जिम्मेवारीलाई निर्वाह गर्नुपर्ने आवश्यकता रहेको प्रशिक्षकहरु नारायण अमृत, सुरेश रानाभाट र केशवशरण लामिछानेले उल्लेख गरे ।

कार्यशालामा नारायण अमृतले गसिपका विषयमा, सुरेश रानाभाटले रिभ्युका विषयमा र केशवशरण लामिछानेले कन्टेन्टका विषयमा प्रशिक्षण गरेका थिए ।

चलचित्र पत्रकार संघ कास्कीका संस्थापक अध्यक्ष श्रीराम सिग्देलले संस्थाको स्थापनाका विषयमा जानकारी गराउँदै संघको गतिविधि निरन्तर भइरहेकोप्रति खुशी व्यक्त गरे ।

चलचित्र पत्रकार संघ कास्कीका अध्यक्ष प्रभु अधिकारीले पर्यटकीय गाउँ घलेल सामुदायिक होमस्टेमा कार्यशाला हुनुले त्यस ठाउँको पर्यटन प्रवद्र्धनमा सघाउ पुग्ने बताए ।

संघले आगामी दिनमा पोखरामा चलचित्र पत्रकारितालाई बढ्वा दिन विविध कार्यक्रम गर्दै जाने संघका सचिव सन्तोष बस्यालले बताए ।

कार्यशालामा सहभागी प्रशिक्षार्थी राजाराम पौडेल र बालकाशी गुरुङले तालिम फलदायी भएको उल्लेख गरे । २०६७ सालमा स्थापना भएको होमस्टे पर्यटकीय दृष्टिकोणले प्रचुर सम्भावना भएको ठाउँ हो ।

कास्की जिल्ला माछापुच्छ्रे गाउँपालिका वडा नम्बर ८ र ९ मा रहेको घलेल सामुदायिक होमस्टेलाई प्रचारको आवश्यकता रहेको घलेल सामुदायिक होमस्टेकी सचिव सुनकुमारी गुरुङले बताइन् ।

उनले घलेल गाउँमा आयोजना गरिएको कार्यशाला मार्फत उक्त ठाउँको प्रचारमा टेवा पुग्ने विश्वास लिएकी छिन् ।

नजिकैको गाउँ ल्वाङ पर्यटकीय रुपमा अगाडि बढ्दा घलेल भने जहाँको त्यहीँ रहेको धारणा उनको छ ।

घलेलमा ९ घरमा मात्रै होमस्टे संचालन गरिएको छ ।

घलेल सामुदायिक होमस्टेले सहभागीहरुलाई पञ्चेबाजासहित स्वागत गरेको थियो । कार्यशालालाई सम्पन्न गर्न मुख्यमन्त्री तथा मन्त्रिपरिषदको कार्यालय गण्डकी प्रदेश, पोखरा महानगरपालिका, माछापुच्छ्रे गाउँपालिका, पोखरा प्रज्ञा प्रतिष्ठान, परिचय एड्भटाइजिङ र होटल पुस्कर लगायतले सहयोग गरेका थिए ।