पोखरा ।
नेपाली राष्ट्रिय भलिबल टिमकी कप्तान अरुणा शाहीलाई गण्डकी विश्वविद्यालयले सम्मान गरेको छ । गत फागुन २३ गते आयोजना भएकाे पल्सर स्पोट्र्स अवार्डमा ‘महिला वर्ष उत्कृष्ट खेलाडी’ जितेकी अरुणालाई विश्वविद्यालयले बुधबार सम्मान गरेको हो ।

विश्वविद्यालयका कुलपति प्राडा. गणेशमान गुरुङले कप्तान अरुणालाई भलिबलसहित सम्मान गरे । कुलपति प्राडा. गुरुङले अरुणाले उत्कृष्ट खेलाडी घोषणा हुँदा विश्वविद्यालयले गर्व महसुस गरेको बताए । उनले खेलकुदसँगै पढाइसँगै लडेर अगाडि बढ्न आग्रह गरे ।

कार्यक्रममा उपकुलपति प्राडा. नवराज देवकोटा र डिन डा. कपिल अधिकारीले अरुणालाई बधाई दिएका थिए । अरुणाले सम्मानित गरेकोमा विश्वविद्यालयलाई धन्यवाद व्यक्त गरिन् । भलिबलकी अरुणा र फुटबलका अञ्जन विष्ट पल्सर स्पोर्टस् अवार्ड २०७८ वर्षका वर्ष उत्कृष्ट खेलाडी घोषित हुन् ।

अरुणा उक्त विश्वविद्यालयमा स्नातक तहमा खेलकुद व्यवस्थापन विषय पढिरहेकी छन् । यो विश्वविद्यालय नेपालमै पहिलोपटक प्रदेश सरकारद्वारा स्थापना गरेको विश्वविद्यालय हो । विश्वविद्यालयले विभिन्न शैक्षिक कार्यक्रमहरू सञ्चालन गर्नुका साथसाथै विश्वविद्यालयले अन्वेषण र अनुसन्धानलाई समेत प्राथमिकतामा राख्दै आइरहेको छ । यो विश्वविद्यालय स्नातक तहमा खेलकुद व्यवस्थापन विषयको पठनपाठन सुरु गरेको नेपालकै पहिलो र एकमात्र विश्वविद्यालय हो ।