पोखरा ।
नेपाल टेलिकमले एसइई दिने विद्यार्थीका लागि एसइई २०७९ अफर उपलब्ध गराउने भएको छ । कम्पनीले एसइई परीक्षा दिएका विद्यार्थीलाई सित्तैमा सिम उपलब्ध गराउनेछ ।

सित्तैमा दिइने सिममा रिचार्ज गर्दा बोनस पनि उपलब्ध हुनेछ । शुक्रबार उपलब्ध हुने यो अफर ३ महिनासम्म उपलब्ध हुने टेलिकमका प्रवक्ता शोभन अधिकारीले जानकारी दिए । बोनस अन रिचार्ज सेवा ६ महिनासम्म उपलब्ध हुनेछ । नेपाल टेलिकमका देशैभरका कार्यालयबाट यो सेवा उपलब्ध हुनेछ ।

सिमकार्ड प्रयोगमा आउनासाथ ३० दिनसम्मका लागि विभिन्न अफर उपलब्ध हुनेछन् । विद्यार्थीसँग पहिलेदेखि नै नेपाल टेलिकमको सिम छ भने सोही सिममा यी अफर उपयोग गर्न सक्ने व्यवस्थासमेत गरेको छ । नयाँ सिम प्राप्त गरेका विद्यार्थीले सिम कार्डमा मेन ब्यालेन्स १० रुपैयाँ पाउनेछन् ।

१ महिनासम्म ४० मिनेट अन नेट कल गर्न, ६० एमबी डाटा र ३० अन नेट एसएमएस सुविधा सिममा हुने । यसका अतिरिक्त यसबाट नेपाल टेलिकमको नेटवर्कभित्र दैनिक २० मिनेट कुराकानी गर्न र १० वटा एसएमएस पठाउन तथा १०० एमबी डाटा प्रयोग गर्न सकिनेछ ।

नयाँ सिम लिन विद्यार्थीले प्रवेश पत्र वा कक्षा १० को मार्कसिटको फोटोकपी, १ प्रति फोटो र अभिभावकको नागरिकता वा आफ्नो परिचयपत्रको फोटोकपी संलग्न गरी फाराम भर्नुपर्ने छ ।