पोखरा

कास्कीमा लागुऔषध व्यसनीको संख्या घटेको छ । चालु आर्थिक वर्ष २०७९–२०८० को पहिलो नौ महिना सम्ममा ५८ वटा मात्रै मुद्दा दर्ता भएका छन् ।
प्रेस क्लब गण्डकीले बुधबार पोखरामा आयोजना गरेको “लागु औषध दुर्व्यसनी विरुद्ध सञ्चारकर्मीको भूमिका” विषयक सचेतना मुलक कार्यक्रममा आर्थिक वर्ष २०७७–२०७८ मा १ सय ४९ थान र २०७८–२०७९ मा  २ सय ४३ थान मुद्दा दर्ता भएको तथ्यांक सार्वजनीक गरिएको थियो ।

अघिल्लो वर्षको तथ्यांक र चालु आबको नौ महिनाको तथ्यांक हेर्दा लागुऔषध प्रयोगकर्ताको संख्या घटेको जिल्ला प्रहरी कार्यालय कास्कीका प्रहरी निरीक्षक तिलक मानन्धरले बताए ।

 अघिल्ला दुई वर्षको आधारमा अहिलेको नौ महिनामा दर्ता भएको मुद्दालाई विश्लेषण गर्दा घटेको देखिएको छ उनले भने, “अवको तीन महिनामा त्यती धेरै मुद्धा दर्ता हुने सम्भावना देखिँदैन ।” त्यस्तै लागु औषध व्यसनकर्ताको उमेर अनुसार सबैभन्दा धेरै १५ देखि २४ वर्ष उमेर समूहका छन् । प्रहरी निरीक्षक मानन्धरका अनुसार १५ देखि २४ उमेर समूहका ५२ प्रतिशत रहेका छन् । ४२ प्रतिशत २५ देखि ३५ वर्षका रहेका रहेको उनले बताए ।  ३१ प्रतिशत ११ र १२ कक्षाका विद्यार्थी व्यसनमा फसेको प्रहरी निरीक्षक मानन्धले बताए ।

उनले अभिभावकहरुले आफ्ना वालवालिकाका बारेमा हरदम जानकारी राख्ने, वालवालिकाको हालसालैको फोटो सधै साथमा राख्ने, वालवालिकाको पहिरन, हुलिया बारेमा जानकारी राख्ने, साथी–सँगीको बारेमा जानकारी राख्ने, फोन नंबर राख्ने र  स्कुल/कलेज तथा अन्य रुटका बारेमा अभिभावकले सधै चनाखो भइ ध्यान दिनु पर्ने उल्लेख गरे। बालबालिकाको बद्लिदो व्यवहार प्रति चनाखो रहने, वालवालिका अपराधकर्म तर्फ प्रेरित हुनसक्ने बारेमा सजक रहनुपर्नेमा सुझाव दिए ।

आफना बालबालिकालाईे घरको वातावरण वालवालिका मैत्री बनाउने, प्रतिकुल अवस्था जस्तै विपद्, आपराधिक घटना, बन्धक बनाइएको अवस्था, हराएको अवस्था आदिमा हुनसक्ने सम्भावित खतरामा अपनाउनुपर्ने बताए ।

कार्यक्रममा पोखरा महानगरपालिका कार्यपालिका सदस्य एवं सामाजिक विकास समितका सदस्य धनकुमारी पोखरेल तिमिल्सेनाले लागु औषध बारे परिवारसम्मै सचेतना जगाउनुपर्ने खाँचो औंल्याइन्  । उनले कुलतमा  बालबालिका फस्ने गरेको बताउँदै त्यसबाट जोगाउन साझा प्रयास आवश्यक रहेको उल्लेख गरिन् ।

प्रेस क्लब गण्डकीका अध्यक्ष एकराज गिरीको अध्यक्षतामा भएको कार्यक्रममा उपाध्यक्ष राजाराम पौडेल र सचिव गौरव त्रिपाठीले सञ्चार माध्यम र सञ्चारकर्मीको भूमिका महत्वपूर्ण हुने भएकाले कार्यक्रम आयोजना गरिएको बताए ।