पोखरा ।
नेकपा (एमाले)को मिसन ग्रासरुट’(पार्टी सुदृढीकरण तथा विस्तार) अभियान २०७९)अन्तर्गत शनिबार पेशागत बुद्धिजीवी भेला भएको छ । पार्टीको बुद्धिजीवी विशेष इलाका कमिटी कास्की, नेपाल बुद्धिजीवी परिषद् कास्की र पेशागत महासंघ नेपाल कास्कीले संयुक्त रुपमा आयोजना गरेको भेलामा नयाँ वर्ष २०८० को अवसरका शुभकामना आदान गरिएको छ ।

पार्टीको केन्द्रीय कमिटी सचिव तथा गण्डकी प्रदेश कमिटीका इन्चार्ज पद्मा अर्यालले नेकपा (माओवादी केन्द्र)का अध्यक्ष पुष्पकमल दाहालको निष्ठा विहीन राजनीतिले मुलुक अस्थिरता धकेलिएको बताइन् । उनले प्रचण्डले एमालेसँगको सहकार्य तोडेपछि बामपन्थी एकता कमजोर भएको टिप्पणी गरिन् ।

‘एमालेले राष्ट्रिय कोर्षलाई बदल्न खोजेकोमा त्यसलाई खण्डित गर्ने काम भएको छ,’ उनले भनिन्, ‘मुलुक अस्थिरतातर्फ धकेलिनु प्रचण्डको निष्ठाविहीन राजनीतिको कारणले हो । जसले मुलुकलाई पछाडि धकेल्ने काम भएको छ ।’ उनले प्रचण्ड माधव नेपालले कम्युनिस्ट आन्दोलनलाई कमजोर बनाएको आरोप लगाइन् ।

उनले संगठनलाई थप बलशाली बनाउन पार्टीले चलाएको २ महिने अभियान अन्तर्गत कार्यकर्ता भेला तथा अभिमुखीकरण गरिएको जानकारी दिइन् । उनले अभियान अन्तर्गत पार्टी सदस्यता नवीकरण र विस्तार, पार्टी प्रवेश र टोल बस्ती स्तरमा पार्टी कमिटी गठन पुनर्गठन र सदृढीकरणको योजना बनाएर काम गरेको बताइन् ।

अभियानका क्रममा वैशाखको पहिलो हप्तादेखि उपलब्धि मापन गर्ने उल्लेख गर्दै सचिव अर्यालले ग्रास रुटको यर्थात् अवस्थाको आधारको प्रतिवेदनको आधारमा पार्टीलाई सुधार गर्ने जानकारी दिइन् । ‘पार्टीमा जे नहोस् ठानेको थियो, अहिले त्यही भएको छ,’ उनले भनिन्, ‘यो खराब चिजलाई पार्टीले वेलैमा सच्याउनु पर्छ । नसच्याए समाजवादको गन्तव्य तय गर्न सकिन्न ।’ उनले मिसन ग्रास रुट अभियानले एमालेलाई सुदृढ पार्टी बनाउने दाबी गरिन् ।

कार्यक्रममा पार्टीका स्थायी कमिटी सदस्य एवं गण्डकी प्रदेशका मुख्यमन्त्री खगराज अधिकारीले नेकपा (माओवादी केन्द्र)ले प्रधान शत्रु नेपाली कांग्रेसलाई मित्र शक्ति ठानेर सत्ता सहकार्य गरेको बताए ।

माओवादीको वैचारिक तथा सांस्कृतिक विचलनले मुलुक गलत दिशातर्फ गएको आरोप लगाउँदै उनले नेपाली कांग्रेस र माओवादी केन्द्रको सत्ता साझेदारीको अवधिमा नीतिगत भ्रष्टाचार बढी भएकाले पतन वाहेकको विकल्प नभएको चर्चा गरे ।

उनले भूगोल अन्तर्गतका सबै पालिकामा अभियान चल्दा पार्टीको जिल्ला कमिटी कास्कीले बुद्धिजीवी तथा पेशाकर्मीलाई लक्षित गरी कार्यक्रम नचलाएको जानकारी दिए । कास्कीको सन्दर्भमा विशेष व्यवस्था गरेर बुद्धिजीवी पेशाकर्मीबीच पार्टी पुगेको अवस्थालाई बिर्सन नहुने उनले उल्लेख गरे ।

पार्टीको विचार तथा नीति निर्माणमा पेशाकर्मी तथा बुद्धिजीवीको विशेष भूमिका रहेको उल्लेख गर्दै उनले परराष्ट्र नीति तथा विश्व शक्ति सन्तुलनको अवस्थालाई बुझेर पार्टीलाई सुझाव दिन आग्रह गरे ।

नेकपा (एमाले)का केन्द्रीय सदस्य तथा कास्की इन्चार्ज कृष्ण थापाले पार्टी सुदृढीकरण तथा विस्तार अभियानका लागि अभियान प्रभावकारी बन्ने दाबी गरे । सबै अभियानलाई प्रभावकारी ढंगले सञ्चालन गरेर एमाले एकै पटक केन्द्रदेखि मतदाताको घरदैलोसम्म पुगेको उल्लेख गर्दै उनले अभियान नयाँ कुरा नभएर नेता कार्यकर्तासँग र कार्यकर्ता जनतासँग जोडिने जानकारी दिए ।