पोखरा ।
गण्डकी प्रदेश सभाको एक निर्वाचन क्षेत्र, एक पूर्वाधार विकास कार्यक्रम अन्तर्गत पोखरा २१ दोपहरे–कृस्ति–माझगाऊ–बक्रेक–पौवैगौंडे सडक निर्माण भएको छ ।

गण्डकी प्रदेश सरकारले सुरुवात गरेको कार्यक्रम अन्तर्गत बनेको सडकको गण्डकी प्रदेशका मुख्यमन्त्री खगराज अधिकारीले आइतबार उद्घाटन गरे । कास्की क्षेत्र नम्बर २(१)का तत्कालीन प्रदेश सभा सदस्य कृष्ण थापाले यो योजना चयन गरेका थिए ।

भौतिक पूर्वाधार विकास तथा यातायात व्यवस्था मन्त्रालय अन्तर्गतको भौतिक पूर्वाधार विकास कार्यालयको स्वीकृत वार्षिक बजटेबाट आर्थिक वर्ष २०७९ ÷८० मा सडकको निर्माण सम्पन्न भएको हो ।

कार्यालयका प्रमुख डा महेन्द्र बानियाँका अनुसार २४ करोड ८९ लाख ४७ हजार ७ सय १८ रुपैयाँ लागतमा बनेको सडकको १२ दशमलव ३ किलोमिटर लामो छ । उनले २०७६ वैशाख १३ गते सम्झौता भएको सडक २०७९ साउन ५ गते निर्माण सम्पन्न भएको जानकारी दिए ।

रमन/भिमेश्वर जेभी नामक निर्माण कम्पनीले यो सडक बनाएको हो । गण्डकी प्रदेश सभाका पूर्व सदस्य कृष्ण थापाले दोपहरे कृस्ति माझगाऊ बक्रेक पौवैगौंडे सडकलाई सिद्धार्थ राजमार्गको वैकल्पिक मार्गका रुपमा लिइएको बताए । गण्डकी प्रदेश सभाका सदस्य भीम कार्कीले सडकले पोखराको दक्षिणी क्षेत्रका जनता लाभान्वित हुने जनाए ।

गण्डकी प्रदेश सरकारको एक निर्वाचन क्षेत्र, एक पूर्वाधार कार्यक्रम अन्तर्गत कास्की जिल्लामा ६ योजना छन् । ती योजनामध्ये निर्माण सम्पन्न भएको योे सडक दोस्रो योजना हो । यसअघि रुपा रिङरोड उद्घाटन भएको थियो । सो कार्यक्रम अन्तर्गत वीरेठाँटी घान्दु्रक सडकको निर्माण कार्य पूरा भएको कार्यालय प्रमुख डा बानियाँले जानकारी दिए ।

काहुँखोला दुधपोखरी सिक्लेस सडकको पहिलो खण्डको काम सकिएको छ । भलाम हरिहर गुफा तथा मेयलबोट मर्दी बानेटाकुरा लाहाचोक सडक योजना निर्माण सम्पन्न हुने चरणमा रहेको पूर्वाधार विकास कार्यालय कास्कीले जनाएको छ ।