पोखरा ।
पोखरा लिंकन इन्टरनेसनल कलेजमा मास्टर्स अफ बिजनेस एड्मिनिस्ट्रेसन (एमबिए) पढाइ सुरु भएको छ । मलेसियाको लिंकन युनिभर्सिटीसँगको आबद्धतामा पढाइ सुरु भएको हो ।

लिटल स्टेप माध्यमिक विद्यालय र बिएमजी माध्यमिक विद्यालयबाट प्रवद्र्धित कलेजमा साँझ साढे ५देखि साढे ८ बजेसम्म एमबिए पढाइ हुन्छ । यसअघि ४ वर्षे बिबिए र बिएचएम पढाइ हुँदै आएको लिंकनमा एमबिए कार्यक्रम पनि ४ सेमेस्टरकै हो ।

सोमबार कलेजमा आयोजित कार्यक्रममा एमबिए कार्यक्रमका चिफ एकेडेमिक अफिसर अनिल अर्यालले यो कार्यक्रम भौतिक र अनलाइन दुवै माध्यमबाट विद्यार्थीले पढ्न सक्ने बताए । प्रालिका अध्यक्ष शेरबहादुर गुरुङले लिटल स्टेप मावि ४१ वर्ष प्रवेश गर्दै गर्दा हालसम्म धेरै डाक्टर, इन्जिनियर, समाजसेवी लगायत उत्पादन भएको सुनाए ।

देश विकासका लागि टेवा दिने खालको जनशक्ति उत्पादन गर्ने उद्देश्यका साथ आपूहरु शैक्षिक क्षेत्रमा आएको उनले सुनाए ।

डा. गणेश गुरुङले वार्षिक ६८ अर्ब रुपैयाँ नेपालबाट शिक्षा आर्जनका नाममा विद्यार्थीमार्फत बाहिरिने गरेको तथ्यांक सुनाए ।

हरेक महिना पढ्न जाने ५ सयदेखि ६ सय विद्यार्थीमार्फत हुने यस्तो पुँजी पलायन रोक्न केही हदसम्म भए पनि लिंकनको एमबिएले सघाउ पुग्ने उनको भनाइ छ । कलेज संस्थापक प्राचार्य पम्फा गुरुङ र बोर्ड सदस्य भीमनाथ बरालले पनि कार्यक्रममा बोलेका थिए ।