जोमसोम– मुस्ताङमा लेंक लागेर एक भारतीय महिलाको मृत्यु भएको छ ।भारतको लखनउ बस्ने ६९ वर्षीया महिला रिता मेहरोत्राको बुधबार लेंक लागेर मृत्यु भएको जिल्ला प्रहरी कार्यालय मुस्ताङले जनाएको छ ।

भारतको लखनउ देखि मुस्ताङको मुक्तिनाथ दर्शन गर्न आएकी महिलाको अल्टिच्युडका कारण श्वाशप्रश्वासमा समस्या देखिएपछि मुस्ताङ अस्पतालमा भर्ना गरिएको थियो । उनको उपचारको क्रममा मृत्यु भएको जिल्ला प्रहरी कार्यालय मुस्ताङका सूचना अधिकारी गोपीकृष्ण सुवेदीले जानकारी दिए ।

पोखराबाट म्याग्दी हुँदै सडकमार्गबाट बलेरो जीपमा भारतीय टोली मुक्तिनाथ दर्शन जाने क्रममा पुथाङ एअरपोर्ट जोमसोमको एक होटलमा राती बाँस बसेका थिए । टोलीमा मृतकका आफन्त र छिमेकी थिए । लेक लागेर मृत्यु भएकी महिलाको शव परिवारलाई हस्तान्तरण भईसकेको र शव जोमसोममै अन्त्येष्टि गरिएको बताईएको छ ।

मुस्ताङको उच्चउचाईको क्षेत्रमा आउँदा अक्सर भारतीय पर्यटकलाई हाईअल्टिच्युडको समस्या देखिने गरेको पाईएको छ । उमेर पुगेका र स्वास्थ्यमा विभिन्न समस्या देखिएका पर्यटकलाई मुस्ताङमा अल्टिच्युडको समस्या देखिने गरेको प्रहरीको भनाई छ ।

चालु वर्षको फागुन देखि यता झन्डै आधा दर्जन भारतीय पर्यटकको लेंक लागेर मृत्यु भईसकेको छ ।