गलेश्वर
म्याग्दीमा मंगलबार राति मोटरसाइकलको ठक्करबाट चितुवाको मृत्यु भएको छ । बेनी नगरपालिका १ रत्नेचौरको घैयारामा बागलुङबाट आउँदै गरेका सुशील खत्रीको बा८प ४०७२ नम्बरको मोटरसाइकलको ठक्करबाट चितुवाको मृत्यु भएको हो ।

सडक पार गर्दै गरेको चितुवा मोटरसाइकलसित ठोक्किएपछि घटनास्थलमै मृत्यु भएको डिभिजन वन कार्यालय म्याग्दीका प्रमुख मनोज रानाभाटले जानकारी दिए । चितुवाको टाउको मोटरसाइकलमा ठोक्किएको थियो ।

करिब ४० किलोको चितुवा २ वर्ष आसपासको भएको अनुमान छ । मोटरसाइकल चालक खत्रीको अवस्था भने सामान्य रहेको जिल्ला प्रहरी कार्यालयले जनाएको छ । वनजंगलमा लागेको डढेलोका कारण अहिले चितुवाको बासस्थान खल्बलिएको प्रमुख रानाभाट बताउँछन् ।