पोखरा ।
गण्डकी प्रदेशस्तरिय राष्ट्रपति कप रनिङ शिल्डमा कास्की च्याम्पियन बनेको छ । प्रदेश खेलकुद परिषद गण्डकीको आयोजनामा पोखरा रंगशालामा मंगलबार सकिएको प्रतियोगितामा कास्की ३२ पदक प्राप्त गर्दै टिम च्याम्पियन बनेको हो ।

कास्कीले १४ स्वर्ण, १३ रजत र ५ कास्य पदकसहित नगद ३० हजार हात पारेको छ । गत वर्षको च्याम्पियन बागलुङ दोस्रो भएको छ । प्रतियोगितामा बागलुङ १० स्वर्ण, ५ रजत र १० कास्य पदक गरी २५ पदकमा रह्यो । नवलपुर ७ स्वर्ण, ३ रजत र ८ कास्य गरी कुल १८ पदकसहित तेस्रो बन्यो ।

बागलुङले नगद २० हजार र नवलपुरले नगद १० हजार पाएका छन् । मंगलबार नै भएको छात्र भलिबल फाइनलमा नवलपुर विजयी भएको छ । नवलपुरले २८–२६ र २५–२० ले बागलुङलाई पराजित गरेको हो ।

पर्वतले गोरखालाई २५–२०, २५–१८ ले जित्दै तेस्रो भएको छ । छात्रा भलिबलमा कास्कीले बाजी मारेको छ । कास्कीले स्याङ्जालाई २५–१८ र २५–२१ ले फाइनल खेल जित्दा म्याग्दीले तनहुँलाई २५–२०, १९–२५ र २५–१९ ले जितेर तेस्रो भएको छ ।

एथलेटिक्सतर्फ कास्कीले ६ स्वर्ण ८ रजत पदक जित्दै प्रथम भएको छ भने नवलपुर ५ स्वर्ण, १ रजत र ५ कास्य पदक जितेर दोस्रो र स्याङ्जा ४ स्वर्ण र १ कास्यका साथ तेस्रो बनेका छन् ।

कबड्डी छात्रतर्फ कास्की प्रथम भएको छ । कास्कीले म्याग्दीलाई ४३ का विरुद्ध ४५ अंकले पराजित गर्दै पहिलो भएको हो भने बागलुङ र गोर्खा तेस्रो भएका छन् । छात्रा कबड्डीतर्फ बागलुङले तनहुँलाई ६६ का विरुद्ध २० अंकले पराजित गर्दै पहिलो हुँदा नवलपुर र स्याङ्जा तेस्रो भएका छन् ।

मार्सल आर्ट उशुतर्फ समग्रमा बागलुङ ४ स्वर्ण २ रजतका साथ पहिलो, कास्की २ स्वर्ण र २ रजत र २ कास्य पदकका साथ दोस्रो, म्याग्दी २ रजत र ५ कास्य पदकका साथ तेस्रो हुँदा तेक्वान्दोतर्फ म्याग्दीले २ स्वर्ण १ रजत, कास्कीले २ स्वर्ण, २ रजत र १ कास्य तथा नवलपुर १ स्वर्ण २ रजत १ कास्य पदकका साथ क्रमश पहिलो, दोस्रो र तेस्रो भए । यस्तै कराँतेतर्फ म्याग्दी जिल्ला प्रथम भएको छ । प्रतियोगितामा ६ खेल भएका थिए ।

विजेता टिम तथा खेलाडीलाई सामाजिक विकास तथा स्वास्थ्य मन्त्रालय गण्डकी प्रदेशका सचिव हेमराज सुवेदी, प्रदेश खेलकुदका उपाध्यक्ष धोजकुमार गुरुङ, परिषदका कार्यकारी सदस्यद्वय दिलबहादुर गुरुङ र ऋषिराम गौतमले ट्रफी, मेडल र प्रमाणपत्र वितरण गरे ।

प्रदेश खेलकुदका सदस्य सचिव घनश्याम पौडेलको अध्यक्षतामा भएको कार्यक्रम भएको हो । यो प्रतियोगिताबाट छनोट भएका खेलाडी १५ वैशाखबाट काठमाडौंमा हुने १३ औं केन्द्रीय राष्ट्रपति रनिङ सिल्डमा सहभागिता जनाउन १४ गते त्यसतर्फ प्रस्थान गर्ने छन् ।