पोखरा ।
उपनिर्वाचनमा पुराना पार्टीप्रति जनताको मोहभंग भएको प्रभाव पर्वतमा देखिएको छ । नेपाली कांग्रेसका पर्वतका प्रभावशाली युवा नेता मिलन सुवेदीले कांग्रेसको साधारण सदस्य समेत परित्याग गरेको घोषणा गरेका छन् । सुवेदी जिल्ला अधिवेशनमा गगन थापा पक्षबाट सभापति उम्मेदवार बनेर युवराज जोशीसँग पराजित भएका थिए । उनी नेविसंघका पूर्व जिल्ला सभापति समेत हुन् ।

कांग्रेसको १४ औं महाधिवेशनमा जिल्ला सभापतिको प्रत्याशी रहेका सुवेदी पर्वतमा गगन थापा समूहका नेता मानिन्छन् । सुवेदीसहित ३१ जना जिल्लास्तरीय नेता कार्यकर्ताहरुले कांग्रेस परित्याग गरी स्वतन्त्र रहेको घोषणा गरेका हुन् । कांग्रेस परित्याग गरेका नेताहरु चाँडै राष्ट्रिय स्वतन्त्र पार्टीमा समाहित हुने तयारीमा छन् ।

उनीसँग जिल्ला कार्य समिति सदस्य किसान थापा, फलेबास नगरपालिकाका सचिव सागर भुसाल, प्रदेश सभा सदस्यको उम्मेदवार बनेका कमलराज पौडेल, नेविसंघका निवर्तमान जिल्ला सभापति सन्तोष पाठक लगायत छन् ।

तनहुँ १, चितवन २ मा कांग्रेसलाई ठूलो मतान्तरले पराजित गर्दै राष्ट्रिय स्वतन्त्र पार्टीले उपनिर्वाचन जितेपछि कांग्रेसमा पहिरो जाने अडकलका बीच पर्वतमा नेताहरुले पार्टी छाडेका छन् । कांग्रेस छाडेर रास्वपा प्रवेश गरी स्वर्णिम वाग्लेले भारी मतान्तरसहित निर्वाचन जितेका छन् । त्यसको बाछिटा कांग्रेसमा पर्ने विश्लेषण थियो ।