पोखरा ।
विश्वकै कठिन मानिने ‘हिमालयन एक्स्ट्राई वल्र्ड टुरएक्सट्रिम ट्रायथलन’को उपाधि पुरुषतर्फ चेक रिपब्लिकका पिटर भाब्रोसेक र महिलातर्फ अमेरिकाका तारा मिरण्डा पार्सोन्सले जितेका छन् ।

शनिबार बिहान ४ बजे पोखराको फेवातालमा पौडीबाट सुरु भएको सो प्रतियोगिता आइतबार बिहान कास्कीको माछापुच्छ्रे गाउँपालिका ८ ल्वाङमा आएर समापन भएको हो । त्यस क्रममा सहभागी खेलाडी समुद्र सतहबाट ४ हजार ३ सय मिटर उचाइको मर्दी हिमालको ‘भ्यु प्वाइन्ट’सम्म पुगेका थिए ।

पुरुषतर्फ च्याम्पियन पिटरले फेवातालमा ३ किमी ८ सय मिटर पौडी त्यसपछि १ सय ५० किमी साइक्लिङ र ४३ किमी दौड १६ घन्टा ५१ मिनेट १९ सेकेन्डमा पूरा गरे । इटालीका जिओभानी बोर्रटालासोले निर्धारित दूरी १७ घन्टा ५८ मिनेट ८ सेकेण्डमा पार गरी दोस्रो र रसियाका इलिया बब्लिकले निर्धारित दूरी पूरा गर्न १८ घन्टा ३४ मिनेट १२ सेकेन्ड लगाउँदै तेस्रो बने ।

महिलातर्फ उपाधि विजेता मिरण्डाले निर्धारित दूरी पार गर्न १८ घन्टा २० मिनेट ५४ सेकेन्ड लगाइन् । महिलातर्फ फ्रान्सका बेनेडिक पेरोनले १९ घण्टा ४९ मिनेट १९ सेकेन्डमा तोकिएको दूरी पार गर्दै द्वितीय बनिन् । चेक रिपब्लिकका भेरो निकाले २४ घन्टा २८ मिनेट २५ सेकेन्डमा दूरी छिचोलिन् ।

प्रतियोगितामा २२ देशका ३६ खेलाडीले प्रतिस्पर्धा गरेको आयोजक हिमालयन एक्सट्राई नेपालका रेस डाइरेक्टर रिक्की योञ्जनले जानकारी दिए । प्रतियोगीले फेवातालमा पौडीको प्रतिस्पर्धा गरेपछि १ सय ७५ किमी साइकल दौड सुरु गरेका थिए ।

पोखराको लेकसाइडबाट सुरु भएको साइकल दौड सराङकोट, लुम्ले, नयाँ पुल, कुश्मा हुँदै बागलुङ पुगेर त्यहाँबाट पुनः फर्किएर कुश्मा, नयाँ पुल हुँदै कास्कीको अन्नपूर्ण गाउँपालिकाको काँडेमा आएर साइक्लिङ सम्पन्न भएको थियो ।

त्यसपछि ४३ किमी लामो दौड सुरु भएको थियो । काँडेबाट सुरु भएको दौड अस्ट्रेलियन क्याम्प, देउराली, हाइ—क्याम्प, लोक्याम्प, मर्दी हिमाल भ्यू पोइन्ट (चार हजार तीन सय मिटर) छोएर सोही बाटो हुँदै फर्किएर माछापुच्छ्रे गाउँपालिकाको ल्वाङमा समापन भएको योञ्जनले सुनाए । प्रतियोगितामा बेलायत, अमेरिका, अस्ट्रेलिया, नेदरल्यान्ड, ग्रिस, रसिया, चेक रिपब्लिक, इस्टोनिया, बंगलादेश, भारत लगायत मुलुकबाट ५ महिला र ३१ पुरुष खेलाडी सहभागी थिए ।

ल्वाङमा आयोजित समापन कार्यक्रममा राष्ट्रिय खेलकुद परिषद्का सदस्य सचिव टंकलाल घिसिङले साहसिक प्रतियोगिताले नेपाललाई विश्वभर चिनाएको बताए । पर्यटन प्रवद्र्धनसँगै यस्तो खालको प्रतियोगितालाई संसारले चासोपूर्वक हेरिरहेको उनको भनाइ छ । सदस्यसचिव घिसिङले भने, ‘विश्वका उत्कृष्ट खेलाडी नेपालमा आएर प्रतियोगितामा सहभागी भएकाले विश्वभर यहाँका बारेमा राम्रो सन्देश दिएको छ ।’

नेपाल ट्रायथलन संघका केन्द्रीय अध्यक्ष तथा नेपाल ओलम्पिक कमिटीका महासचिव नीलेन्द्रराज श्रेष्ठले नेपालका लागि प्रतियोगिता अत्यन्त महत्वपूर्ण रहेको बताए ।