पोखरा ।
मुस्ताङको वारागुङ मुक्तिक्षेत्र गाउँपालिका ४ कागवेनीमा महिलाका लागि ५ दिने उद्घोषण, भाषण तथा नेतृत्व विकास तालिम भएको छ । तालिम गाउँपालिकाको महिला, बालबालिका तथा ज्येष्ठ नागरिक शाखाद्घारा आयोजना गरिएको हो ।

कार्यक्रममा वारागुङ मुक्तिक्षेत्र गाउँपालिका उपाध्यक्ष दिकी गुरुङले महिलाको नेतृत्व विकासका लागि तालिम निकै प्रभावकारी भएको बताइन् । यस्ता कार्यक्रमलाई आगामी दिनमा पनि निरन्तरता दिईने उनको भनाइ छ ।

गाउँपालिकाका निमित्त प्रमुख प्रशासकीय अधिकृत जनार्दन आचार्यले तालिमपछि महिलाको बोल्ने, भाषण गर्ने कलामा विकास भई आत्मविश्वास बढेकोमा खुसी व्यक्त गरे ।

वडा नं ४ का अध्यक्ष कर्मध्यचो गुरुङले यस्ता तालिमले महिलामा क्षमता विकास गरी समाजमा नेतृत्वदायी भूमिका खेल्न सहयोग पुग्ने बताए ।

सञ्चारकर्मी गोविन्द थापा सिञ्जालीले सहजीकरण गरेको तालिममा वडा नं ४ का कागवेनी, तिरी र पाक्लिङ गाउँका ३० जनाको सहभागिता थियो । कार्यक्रम महिला, बालबालिका तथा ज्येष्ठ नागरिक शाखा प्रमुख ललिता पौडेलको अध्यक्षतामा भएको हो ।