पोखरा ।
म्याद गुज्रिएका १४ लाख रुपैयाँ मूल्य बराबरको बडवाइजर बियर नष्ट गरिएको छ । जिल्ला प्रशासन कार्यालय कास्कीका सहायक प्रमुख जिल्ला अधिकारी गुरुदत्त ढकालको नेतृत्वकोे अनुगमन टोलीले मंगलबार पोखरा महानगरपालिका ५ पस्र्याङमा रहेको लाभाजु इन्टरप्राइजेजबाट बरामद गरिएको १४ लाख बराबरको बियर बुधबार नष्ट गरिएको हो । पोखरा महानगरपालिकासँगको समन्वयमा मुस्ताङचोकमा नष्ट गरिएको हो ।

सहायक प्रजिअ ढकाल नेतृत्वको अनुगमन समितिले इन्टरप्राइजेजबाट म्याद नाघेका ६५० मिलिमिटरको ३१६ कार्टुन र ३३० मिलिमिटरको ६ कार्टुनको २९ हजार ४ सय ५० बोतल बियर बरामद गरेको थियो । ती सबै बोतलका बियर खाल्डोमा खन्याएर नष्ट गरिएको हो ।

उक्त इन्टरप्राइजेजलाई उपभोक्ता संरक्षण ऐनअनुसार कारबाही गर्ने जिल्ला प्रशासन कार्यालय कास्कीका नासु शिवप्रसाद शर्माले बताए । उनले भने, ‘उपभोक्ता संरक्षण ऐनमा म्याद गुज्रेको वस्तु बिक्री गरे र बिलबिजक जारी नगरेको खण्डमा ५० हजारदेखि १ लाखसम्म जरिवाना गर्न सक्ने व्यवस्था छ । त्यसैको आधारमा रहेर जरिवाना हुन्छ ।’