पोखरा ।
गण्डकी प्रज्ञा प्रतिष्ठानले थकाली जातिलाई लक्षित गरेर मुस्ताङमा ढोङटी बाजा बजाउने तालिम सञ्चालन गरेको छ । घरपझोङ गाउँपालिका वडा नम्बर ५ ठिनीमा रहेको जनमुक्ति युवा क्लबको सहकार्यमा भएको एक हप्ते प्रशिक्षणमा ठिनी, स्याङ, चिबाङ गाउँका २७ प्रशिक्षार्थीका सहभागी थिए ।

प्रतिष्ठानका सदस्य सुरेन्द्र गुरुङले प्रशिक्षणमा नेपाल संगीत तथा नाट्य प्रज्ञा प्रतिष्ठानका पूर्व संगीत विभागका प्रमुख अशोक राई र छेवाङ लामाले सहजीकरण गरेको जानकारी दिए ।

संविधान सभाका सदस्य श्रीमाया थकालीले सहभागीलाई प्रमाणपत्र वितरण गर्दै प्रतिष्ठानले भाषा, साहित्य, संगीत, कला र संस्कृतिको संरक्षणका लागि उल्लेखनीय काम गरेको बताइन् ।

समारोहमा जिल्ला समन्वय समिति मुस्ताङका उपप्रमुख आइतलाल थकाली, घरपझोङ गाउँपालिकाका उपाध्यक्ष जमुना थकाली, वडा नम्बर ३का अध्यक्ष फलेन्द्र थकाली, वडा नम्बर ५ का अध्यक्ष प्रदीप थकाली नेपाल पत्रकार महासंघ मुस्ताङका अध्यक्ष सुन्दरकुमार थकाली, जनमुक्ति युवा क्लब ठिनीका अध्यक्ष सञ्जय थकाली, उपाध्यक्ष निरज थकाली लगायतले बोलेका थिए ।