लेखनाथ ।
ट्राफिक सप्ताहको अवसरमा शनिबार सवारी चालक÷परिचालकको स्वास्थ्य परीक्षण गरिएको छ । जिल्ला ट्राफिक प्रहरी कार्यालय कास्कीको आयोजनामा अस्थायी ट्राफिक प्रहरी पोस्टडाँडाको नाकमा आयोजित कार्यक्रममा ५५ चालक÷परिचालकको सुगर, प्रेसर जाँच गरिनुका साथै ५० जनाको आखाँसमेत परीक्षण भएको छ ।

बैशाख २५ गतेदेखि सुरु भएको सप्ताहअन्तर्गत आइतबार भएको कार्यक्रममा राजमार्ग सुरक्षा तथा ट्राफिक व्यवस्थापन कार्यालयका प्रमुख प्रहरी उपरीक्षक सुमनकुमार तिमिल्सिनाले सचेतना नै सडक दुर्घटना न्यूनीकरणको सबैभन्दा प्रमुख अस्त्र भएको जनाए । सडक विभाग, यातायात व्यवस्था कार्यालय, यातायात व्यवसायी, स्थानीय सरकार लगायतका जिम्मेवार निकायले पनि यसमा दायित्वबोध गर्नुपर्ने उल्लेख गरे ।

जिल्ला प्रहरी कार्यालय कास्कीका प्रमुख कृष्णबहादुर चन्दको अध्यक्षतामा भएको कार्यक्रममा लेखनाथ सामुदायिक सेवा केन्द्रका संस्थापक अध्यक्ष मोती गिरी, अस्थायी ट्राफिक प्रहरी पोस्ट डाँडाको नाकका इन्चार्ज प्रहरी सहायक निरीक्षक जितबहादुर केसी र प्रहरी नायब निरीक्षक बद्रि तिमिल्सिनाले बोलेका थिए ।

कार्यक्रममा लेखनाथ सिटी हस्पिटल र हिमालय आँखा अस्पताल घारीपाटनका स्वास्थ्यकर्मीले परीक्षण गरेका थिजए । गण्डकी प्रदेशका ११ जिल्लामा एकै साथ ट्राफिक सप्ताहको अवसरका विभिन्न कार्यक्रम जारी छन् ।