जोमसोम ।
पछिल्लो ६ महिनामा मुस्ताङमा लेक लागेर १० पर्यटककोको मृत्यु भएको छ । चालु वर्षको मंसिरदेखि वैशाख पहिलो हप्तासम्म १० विदेशीको हाइ अल्टिच्युड (लेक लागेर) मृत्यु भएको जिल्ला प्रहरी कार्यालय मुस्ताङले जनाएको छ ।
समुद्री सतहदेखि ३ हजार मिटर उचाईमा पर्ने मुस्ताङ भ्रमणमा आउने पर्यटकलाई हाइ अल्टिच्युडको समस्या देखिने गरेको जिल्ला प्रहरी कार्यालय मुस्ताङका प्रहरी नायब उपरीक्षक रवीन्द्रनाथ पौडेल बताउँछन् । हाइ अल्टिच्युडबाट मृत्यु हुनेमा अधिकतर ४० वर्ष नाघेका छन् ।

गर्मी ठाउँबाट चिसो भूगोलमा मुक्तिनाथ दर्शन तथा घुम्न आउने पर्यटकले आवश्यक सजगता नअपनाउँदा लेक लागेर मृत्युसमेत हुने गरेको छ । स्वास्थ्य अवस्था कमजोर भएका, जेष्ठ नागरिक र दीर्घरोगीलाई मुस्ताङ आउँदा समस्या देखिने गरेको छ ।

मंसिर २ गते मनाङबाट तिलिचो ताल हुँदै मुस्ताङ आउने क्रममा घरपझोङ ५ मा पर्ने मेसोकोन्दो हिमालमा हाइ अल्टिच्युडका कारण थाइल्यान्डका पर्यटक ४९ वर्षीया रटाया फिलायासुजी र ३७ वर्षीया पेनी आरानयुएमको मृत्यु भयो । चैत ४ गते मुक्तिनाथ क्षेत्रमा रुकुमपूर्व पुथा उत्तरगंगा गापा वडा ६ का सतलाल बुढाले ज्यान गुमाए ।

चैत १७ गते मुक्तिनाथ दर्शन गर्न आएका भारत उत्तर प्रदेशका ४८ वर्षीय सहदेव (साँधु) र तेलेङगाना भवानीनगर हैदरवादका ६१ वर्षीया रुपा थाङ्गेलाको हाइ अल्टिच्युडले ज्यान गयो । सोही महिनाको १८ गते ६४ वर्षीय भारतीय नागरिक बुङगा मुरलीको अल्टिच्युडले मृत्यु भयो ।
त्यसको ३ दिनपछि भारत कर्नाटकका ६९ वर्षीय आर जागाराजले सोही समस्याले जान गुमाए । गएको चैतमा मात्रै ५ भारतीय पर्यटकले लेक लागेर ज्यान गुमाएका छन् ।

वैशाखमा भारतको कडारी राजेन्द्र नगरका ६९ वषीया रिता मेहोरोत्रा, धादिङका कपिल ठकुरी र भारतको गान्धीनगर आन्द्रा प्रदेशका ६६ वर्षीय मदुल्ला लक्ष्मी नरंिसम्हा राओकोको लेक लागेर मृत्यु भएको थियो ।