पोखरा ।
बगर भाइखलक ६० वर्षमाथिको ‘सुपर भेट्रान’ फुटबल खेल्न भारत जाने भएको छ । भारतको उत्तराखण्ड राज्यको देहरादूनमा जेठ २६ देखि २९ गते सम्म आयोजना हुने ‘प्रथम राष्ट्रिय मास्र्टस स्पोर्टस २०२३’ अन्तर्गत हुने ‘सुपर भेट्रान’ फुटबलमा सहभागिता जनाउन टोली त्यसतर्फ जान लागेको हो । भारततर्फ प्रस्थान गर्न लागेको टोलीलाई वडा प्रहरी कार्यालय बगरले बिदाई गरेको छ ।

बिदाई कार्यक्रममा पोखरा १ का अध्यक्ष सहारा प्रधानले जितको शुभकामना दिए । कार्यक्रममा वडा प्रहरी कार्यालय बगरका प्रमुख प्रहरी निरीक्षक शालिकराम तिमिल्सिनाले पाको उमेरमा पनि खेलकुदलाई अभिन्न बनाउन सकिन्छ भन्ने उदाहरण भाइखलकले स्थापित गरेको बताए । सो अवसरमा सामाजसेवी तथा वडा प्रहरी कार्यालयका निर्माण तथा सम्भार समितिका अध्यक्ष पुरोषत्तम श्रेष्ठ, बगर भाइखलकका अध्यक्ष दिलबहादुर गुरुङ, महासचिव यामबहादुर गुरुङले आफ्ना भनाई राखेका थिए ।

पहिलोपटक ‘सुपर भेट्रान’ फुटबलमा सहभागिता जनाउन लागेको टोलीमा १५ जना छन् । टोलीमा पूर्व राष्ट्रिय तथा अन्तर्राष्ट्रिय खेलाडीको जमघट छ । जसमा ६९ वर्षीय दिनेश कुमार श्रेष्ठ, ६९ वर्षीय केशव (आनन्द) रञ्जित, ६८ वर्षीय चिनबहादुर गुरुङ, ६६ वर्षीय दिलबहादुर गुरुङ, ६५ वर्षीय जसकाजी गुरुङ र रामबहादुर गुरुङ, ६२ वर्षीय कृष्ण बजिमय, अम्बर गुरुङ र रमेशकुमार श्रेष्ठ, ६१ वर्षीय लोकबहादुर गुरुङ, ६० वर्षीय युद्धबहादुर गुरुङ, जुनकाजी गुरुङ, ओमकार गिरी, धनकुमार गुरुङ (सन्तोष) र शकिल गुरुङ छन् ।