पोखरा ।
डिभिजन वन कार्यालय कास्कीले वृक्षारोपण गरेको छ । राष्ट्रिय वृक्षरोपण दिवसको अवसरमा ‘सन्ततिका लागि सोचौं, समृद्धि र हरियालीका लागि रुख रोपौं’ भन्ने नाराका साथ वन कार्यालयले पोखरा २५ हेमजा, मेलवोट स्थित तीव्रेकोट सामुदायिक वनमा अम्बा, रुखकटहर, एभोकाडो, जामुन, लप्सी लगायतका २ हजार ४ सय वटा विरुवा रोपेको हो ।

डिभिजन वन कार्यालय कास्कीको ३ लाख लगानीमा सामुदायिक वनभित्र फलफूल विरुवा रोपण कार्यक्रम अन्तर्गत सो वनको खण्ड नम्बर १ को करिब ८ हेक्टर वन क्षेत्रमा बिहीबार फलफूलका विरुवा रोपिएको हो ।

कार्यक्रममा गण्डकी प्रदेशका उद्योग, पर्यटन, वन तथा वातावरण मन्त्री दीपेन्द्रबहादुर थापाले वनको बहुआयामिक प्रयोग गरी उद्यमसँग जोड्दै आत्मनिर्भर अर्थतन्त्रको विकास गर्नुपर्नेमा जोड दिए । वन मन्त्रालयका सचिव विशाल घिमिरेले राष्ट्रिय वृक्षारोपण दिवसको महत्वबारे प्रकाश पारे ।

गण्डकी प्रदेशका वन निर्देशक रामकाजी श्रेष्ठले तीव्रेकोट सामुदायिक वन कास्कीको उदाहरणीय वन भएको उल्लेख गरे ।

कास्कीका डिभिजनल वन अधिकृत केदार बरालले वृक्षारोपणले बाँदर लगायतका वन्य जन्तुले वनक्षेत्र भित्र आहारा प्राप्त गर्ने र मानव वन्यजन्तु द्वन्द्व कम गर्न सहयोग पुग्ने विश्वास व्यक्त गरे । तीव्रेकोट सामुदायिक वन उपभोक्ता समूहका अध्यक्ष विशालजंग कुँवरको अध्यक्षतामा कार्यक्रम भएको हो ।