पोखरा ।
माछापुच्छ्रे गाउँपालिका ८ का वडा अध्यक्षले उपभोक्ता समितिका अध्यक्षलाई हातपात गरेको भन्दै नेकपा एमालेले राजीनामा माग गरेको छ । वडाध्यक्ष रामबहादुर गुरुङले उपभोक्ता समितिको अध्यक्ष अमृत भण्डारीलाई हातपात गरेको भन्दै एमाले माछापुच्छ्रे ७ र ८ वडा कमिटीले मंगलबार राजीनामा माग गर्दै ८ को वडा कार्यालयमा तालाबन्दी गरेको छ ।

एमालेले वडा कार्यालयमा व्यानर झुण्ड्याएर वडाध्यक्षलाई कारवाहीको माग गरेको छ । व्यानरमा पटके वडाध्यक्ष राजिनामा दे लगायतका नारा लेखेका छन् ।

वडाध्यक्ष गुरुङले संघीय सरकारको योजना खोरामुख उपल्लो इदिखोला सडकको स्तरउन्नतीको विषयमा उपभोक्ता समितिका अध्यक्ष अमृत भण्डारीले निर्माण कार्यमा ढिलाई गरेपछि सो विषयमा भनाभन मात्र भएको प्रतिक्रिया दिए ।

माछापुच्छ्रे गाउँपालिकाका निवर्तमान अध्यक्ष कर्णबहादुर गुरुङले वडाध्यक्षलाई कानूनी दायरामा ल्याए मात्र तालबन्दी खुलाउने बताए ।

‘यसभन्दा अगाडि पनि कर्मचारीलाई हातपात गर्नुभयो, हामीले क्षमा पनि दियौं । फेरि पुनः उपभोक्ता समितिका अध्यक्षलाई हातपात गर्नुभयो, पिडितले न्याय नपाएसम्म तालबन्दी जारी रहन्छ,’ गुरुङले भने ।