जोमसोम—उपल्लो मुस्ताङमा जाने पर्यटक तथा स्थानीय गम्भिर बिरामी हुँदा वा घाईते हुँदाको अवस्थामा हेलिकोप्टर समन्वय गर्दै बिरामीले अकालमा ज्यान गुमाउन बाध्य रहेको एक कार्यक्रममा उल्लेख गरिएको छ ।जिल्ला विपद् व्यवस्थापन समिति अन्तर्गत जिल्ला प्रशासन कार्यालय मुस्ताङले आयोजना गरेको बहुसरोकारवाला निकाय सम्मिलित विपद् व्यवस्थापन समितिको बैठकमा सरोकारवालाहरुले प्रमुख जिल्ला अधिकारी अनुप केसीको ध्यानार्कषण गराएका हुन् ।
उपल्लो मुस्ताङको लोमान्थाङ गाउँपालिकाको प्रतिनिधित्व गर्दै बैठकमा उपस्थित लोमान्थाङ—५ का वडासदस्य छेवाङ रिन्जिङ गुरुङले उपल्लो मुस्ताङमा कुनै आपत्कालीन विपद् उद्दारको सेवा लिदा हेलिकोप्टर मगाउँने प्रक्रिया झन्झिटिलो भएको बताएका छन् । उनले उपल्लो मुस्ताङको विपद् उद्दारका लागि गृह मन्त्रालयबाट नभई सिधै स्थानीय प्रशासनले अनुमती दिन पाउँने व्यवस्था मिलाउन जिल्ला विपद् व्यवस्थापन समितिलाई अनुरोध गरे । हेलि उद्दारका लागि प्रक्रिया लामो भएकाले समयमै बिरामीको उद्दार नहुँदा पर्यटक तथा स्थानीय नागरिकले अकालमा ज्यान गुमाउन पर्ने अवस्था रहेको उनले सुनाए ।
उपल्लो मुस्ताङ राष्ट्रिय प्रकृति संरक्षण कोष अन्नपूर्ण संरक्षण क्षेत्र आयोजना (एक्याप)को निषेधित तथा नियन्त्रित क्षेत्र अन्तर्गत पर्दछ । सरकारले उपल्लो मुस्ताङको हेलि उडानका लागि स्थानीय प्रशासनको सिफारिसमा गृह मन्त्रालयले अनुमती दिने व्यवस्था छ ।
मुस्ताङको वारागुङ मुक्तिक्षेत्र—४ कागबेनीदेखि माथिको क्षेत्रलाई सरकारले निषेधित तथा नियन्त्रित क्षेत्रको रुपमा लिएको छ । उपल्लो मुस्ताङ जान विदेशी पर्यटकले सरकारलाई ५ डलर रोयल्टी बुझाएपछि मात्र १० दिनका लागि प्रबेश अनुमती दिने व्यवस्था छ ।