मनाङ ।
हिमाली जिल्ला मनाङका पशु चौपायमा लम्पी स्किन रोग (छालामा हुने गिर्खे रोग) देखिएको छ । भेटेरिनरी अस्पताल तथा पशु सेवा विज्ञ केन्द्र मनाङका पशु चिकित्सक नारायण कुसुमले चामे गाउँपालिका २ थानचोकका किसानले पालेको १ गोरुमा लम्पी स्किनको लक्षण देखिएको जानकारी दिए । गोरुलाई उच्च ज्वरो आएको छ । गोरुको छालामा स–सानादेखि ठूलासम्म पूरै गिर्खा देखिएका छन् । ‘बिरामी गोरुले घाँस खान कम गरेको छ, ज्वरो र रोगका लक्षण अनुसारका गिर्खा देखिएको छ’, कुसुम भन्छन् ।

किसानले गोरु बिरामी भएको खबर गरेपछि मंगलबार उपचार गर्न जाँदा गोरुमा लम्पी स्किन रोगको लक्षण देखिएको हो ।

मनाङमा पाइने लुलु गाईबाट जन्मिएको गोरुमा संक्रमण देखिएको उनले बताए । उक्त गोरु होचो कदको छ । ‘गोरुलाई लम्पी स्किन रोगको उपचार सुरु गरिएको छ, अन्य गाईगोरुसँग सम्पर्क नहुने गरी छुट्टै राख्ने प्रवन्ध मिलाएका छौं’, कुसुमले सुनाए ।

मनाङमा पहिलो पटक लम्पी स्किन रोग देखिएको हो । मनाङमा २ हजार डोज लम्पी स्किन रोगविरुद्धको खोप ल्याएको कुसुमले जानकारी दिए । मंगलबारबाट चामे गाउँपालिकाका गाई गोरुमा लम्पी स्किन रोगविरुद्धको खोप लगाउन सुरु गरिएको छ ।

केही दिनपछि नासोँ गाउँपालिकाका किसानले पालेका पशुमा उक्त रोगविरुद्धको खोप लगाउन थालिने उनले बताए । मनाङमा गाईगोरुको संख्या १ हजार ५ सयको हाराहारीमा रहेको कुसुमले बताए ।